“Milan” futbol klubi hujumchisi Zlatan Ibragimovich koronavirus pandemiyasiga qarshi kurash uchun pul yig‘ishni boshladi.
Shvetsiyalik futbolchi Go Fund Me platformasi orqali maxsus fond tashkil qilgan. Undan tushgan mablag‘ Italiyadagi shifoxonalarga beriladi. Fond sahifasida ma’lum qilinishicha, “Zlatan Ibragimovich” niki orqali har biri 50 ming yevrodan ikki marta pul kelib tushgan.
“Italiya menga shunchalik ko‘p narsa berdiki, bu qiyin damlarda o‘zim uchun sevimli bo‘lgan mamlakatga yaxshiliklarni qaytarmoqchiman. Men atrofimdagi odamlar bilan kasalxonalar uchun mablag‘ yig‘ish va bu ma’lumotni keng yoyish uchun bor imkoniyatimni ishga soldim. Bu jiddiy muammo va biz videorolik olish bilan cheklanmay konkret yordam berishimiz kerak”, — deya yozadi futbolchi o‘z Instagram’ida.
Zlatan shuningdek, boshqa sportchilarni ham fondga hayriya qilishga chaqirdi.
“Men bu virusga qarshi kurashda hamkasblarim, barcha sportchilar va o‘z imkoniyati darajasida hayriya qila oladigan odamlarning saxiyligiga umid qilib qolaman. Biz birgalikda barchamizning hayotimiz uchun kurashayotgan kasalxonalar, shifokor va tibbiyot xodimlariga haqiqiy yordam ko‘rsata olamiz. Chunki bugun biz ularga muxlislik qilamiz. Keling birgalikda bu virusni uloqtirib tashlaymiz va bu o‘yinda g‘alaba qozonamiz.
Agar virus Zlatanga kelmasa, Zlatan virus yoniga boradi”, — deya qo‘shimcha qildi Ibragimovich.
https://www.instagram.com/p/B94AT7RHHpd/
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)