Janubiy Koreya Yevropadan keluvchi xorijliklarning mamlakat hududiga kirishida ularni tekshirishda boshqacha usuldan foydalanmoqda. Bu koreyaliklardan tashqari har qanday davlat fuqarolariga taalluqli jarayon, deydi Koreya Respublikasi sog‘liqni saqlash vaziri o‘rinbosari Kim Gan Nip. Bu haqda “RIA Novosti” xabar qilgan.
“COVID-19 koronavirusi global pandemiyasiga qarshi kurash favqulodda chora-tadbirlari Markaziy shtabi so‘nggi vaqtlarda mamlakatga kasallik alomatlari va koronavirus tashxisi bilan kirib kelayotgan shaxslar soni o‘sib borayotganini inobatga olib, 19-martdan boshlab Koreyaga kirib kelayotgan davlat fuqarolari va xorijliklar uchun alohida tartib joriy qilinishini e’lon qiladi”, — deya ta’kidlagan Koreya sog‘liqni saqlash vaziri o‘rinbosari maxsus brifingda.
Uning so‘zlariga ko‘ra, koronavirus mamlaktda tarqala boshlaganidan beri 15-martga qadar Janubiy Koreyada 44 ta holatda infeksiyaning xorijdan kirib kelgani kuzatilgan, jumladan, 14 nafar bemor Xitoydan, yana 14 nafar odam Osiyoning boshqa davlatlari va 16 nafar kishi Yevropadan kirib kelgan.
Biroq oxirgi uch kunda koronavirus xorijdan qaytgan olti nafar koreyalikda kuzatilgan. Shu sababli kasallanganlar soni Amerika qit’asi va boshqa hududlarda ham o‘sib borayotganini hisobga olib, alohida tartib joriy etiladi.
Tartibga ko‘ra, kutib olish zallarida alohida tekshirish amalga oshiriladi: odamlarning tana harorati o‘lchanadi, turli so‘rovnomalar va deklaratsiyalar to‘ldiriladi, kelayotgan davlatdagi aniq manzil ko‘rsatiladi va ishlab turgan aloqa telefoni ko‘rsatiladi, shuningdek, tibbiyot tekshiruvlari xulosasini berib borish uchun maxsus mobil ilova ham yuklab beriladi.
Sog‘liqdagi o‘zgarishlar haqida 14 kun davomida muntazam xabardor qilib turish lozim. Koronavirus alomatlari paydo bo‘lganda xorijdan kelgan odam alohida nazoratga olinadi va virus bo‘yicha tekshiruv testidan o‘tkazishga yuboriladi. Shuningdek, koronavirus bilan kasallanganlar soni ko‘p bo‘lgan davlatlarga borganlar haqidagi ma’lumotlar mahalliy hokimliklar, tibbiyot muassasalari va dorixonalarga ham yuboriladi.
“Xorijdan kelganlarning kutish vaqtini kamaytirish maqsadida ilovada mustaqil diagnostika qilish uchun mobil telefon raqami orqali identifikatsiyalash tizimi kiritiladi va unda turli tillarda ishlovchi xizmatlar mavjud”, — degan Kim Gan Nip.
Mavzuga doir:
Rossiya 1-martdan boshlab “Aeroflot” va Korean Air samolyotlari uchun “Sheremetyevo” aeroportidagi F terminalini yopgan va Janubiy Koreya bilan aviaqatnovlarni vaqtincha to‘xtatgan. Janubiy Koreya ham Seul va Moskva reyslarini 25-aprelgacha to‘xtatilganini e’lon qildi.
Mavzuga doir: “Aeroflot” O‘zbekistonga parvozlarni vaqtincha to‘xtatdi
Izoh (0)