O‘zbekistonda koronavirusga chalingan fuqarolar soni olti nafarga yetdi. Bu haqda Sog‘liqni saqlash vazirligi matbuot xizmati xabar bermoqda.
O‘zbekistonda 15-mart, yakshanba kuni koronavirusga chalinish bilan bog‘liq ilk holat qayd etilgan edi. Virus 11-mart kuni Fransiyadan qaytgan ayolda aniqlangan edi. Keyinroq, 16-martga o‘tar kechasi COVID-19 koronavirus kasalligini yuqtirgan fuqarolar soni yana uch nafarga ko‘paygani ma’lum bo‘ldi.
Ulardan biri 15-mart kuni tongda Istanbuldan qaytgan erkak bo‘lsa, qolgan ikki nafari birinchi bemor — 11-mart kuni Fransiyadan qaytgan ayolning o‘g‘li va qizi ekani ma’lum qilingan edi. Ma’lum qilishlaricha, ayni paytda ushbu fuqaroning turmush o‘rtog‘i va nevarasida ham koronavirus infeksiyasi qayd etilgan.
“Bemorlar bilan muloqotda bo‘lganlarning ro‘yxati olinib, ularning salomatligi ustidan ham tibbiy nazorat o‘rnatildi. Hozirda shifokorlar va mutaxassislar tomonidan belgilangan standartlar bo‘yicha davolash va epidemiologik surishtiruv ishlari davom ettirilmoqda”, — deyiladi Sog‘liqni saqlash vazirligi axborotida.
Mavzuga doir: O‘zbekistonda koronavirus aniqlandi, Navro‘z bekor qilindi, maktab va bog‘chalar ta’tilga chiqdi. Asosiy ma’lumotlar
O‘z navbatida Sog‘liqni saqlash vazirligi huzuridagi Sanitariya-epidemiologik osoyishtalik agentligi birinchi bemor bilan birga Fransiyadan uchib kelgan 24 o‘zbekistonlik karantinga, ularni aeroportda kutib olgan 69 nafar chegara qo‘shinlari, bojxona, aeroport xodimlari 14 kunlik tibbiy kuzatuvga olinganini ma’lum qildi.
Bundan tashqari, agentlik birinchi bemor ayol istiqomat qilgan Qo‘yliqdagi ko‘p qavatli uyda yashovchi 230 nafar fuqaroning ro‘yxati shakllantirilib, ular tibbiy kuzatuvga olinganini ham ma’lum qilgan edi.
Izoh (0)