Milliarder Oleg Deripaska Rossiya koronavirusga tayyor emasligini aytdi

Rossiyalik biznesmen Oleg Deripaska koronavirus infeksiyasining tarqalishi sababli Rossiyada 60 kun davomida to‘liq karantin joriy etish va shu vaqt davomida chet elliklar uchun chegaralarni yopish va ommaviy tadbirlarni bekor qilish kerakligini aytdi. Bu haqda “RBK” xabar bermoqda.

“Bu vahima yoki jamiyatning ilojsiz ahvolining namoyon bo‘lishi emas, balki yagona to‘g‘ri qarordir”, — deb yozgan u o‘zining Telegram kanalida. Uning fikricha, agar yaqin vaqtlarda chegaralar yopilmasa, Rossiyada infeksiyaning tarqalishi va kasallanganlar sonining ortishini to‘xtatib bo‘lmaydi.

Deripaskaning ta’kidlashicha, korxona va davlat idoralari rahbarlari 2 kun ichida karantinni ta’minlash uchun barcha zarur choralarni ko‘rishi kerak. Mamlakat koronavirus epidemiyasiga tayyor emas, rossiyaliklar kasallikning oldini olish bo‘yicha asosiy xavfsizlik choralariga amal qilmayapti.

“Bizning madaniyatimiz, turmush tarzimiz, epidemiyaga munosabatimiz bizga hech qanaqasiga muqobil tarzda yashash huquqini bermaydi. Metrodan tushing yoki savdo markaziga boring — hech kim niqob taqmayapti”, —degan u.

Milliarderning so‘zlariga ko‘ra, agar zaruriy choralar ko‘rilmasa, hukumat uchun koronavirus infeksiyasining tarqalishi oqibatlari 1991-yildagi davlat qulashidan ham jiddiyroq bo‘ladi.

Rossiyada 13-mart holatiga ko‘ra, 45 kishida koronavirus aniqlangan, ularning 42 nafari rossiyalik, ikki nafari xitoylik va bir nafari Italiya fuqarosi hisoblanadi. Avvalroq Rossiya Sog‘liqni saqlash vazirligi sakkiz kishi, shu jumladan, barcha xorijliklar sog‘aygani va kasalxonadan chiqarilganini ma’lum qilgan.

Koronavirus tarqalishi fonida prezident Vladimir Putinni himoya qilish uchun barcha zarur chora-tadbirlar ko‘rilmoqda.