O‘zbekiston mudofaa vaziri Bahodir Qurbonov 14-mart kuni bir kunlik tashrif bilan Tojikistonga boradi. Bu haqda Tojikiston Mudofaa idorasidagi manbasiga tayanib, Asia-Plus xabar berdi.
Bahodir Qurbonov tashrif davomida “Faxrobod” harbiy poligonida O‘zbekiston va Tojikiston maxsus bo‘linmalari ishtirokida o‘tkazilayotgan antiterroristik o‘quv mashg‘ulotlarini kuzatadi.
Tojikiston mudofaa vaziri Sherali Mirzo va O‘zbekiston mudofaa vaziri Bahodir Qurbonov mashg‘ulotda faol ishtirok etgan harbiy xizmatchilarga esdalik va qimmatbaho sovg‘alarni topshiradi.
Ta’kidlanishicha, Mirzo va Qurbonovning uchrashuvi davomida ikki mamlakat o‘rtasidagi harbiy-texnikaviy munosabatlarni rivojlantirish istiqbollarini muhokama qiladi.
11-mart kuni boshlangan mashg‘ulotlar davomida ikki mamlakat harbiylari Tojikiston va O‘zbekiston chegaralarini kesib o‘tishda vaziyatni beqarorlashtirish uchun chiqqan shartli terrorchilarni qurshovga olish va yo‘q qilish bo‘yicha qo‘shma harakatlarni ishlab chiqadi.Eslatib o‘tamiz, O‘zbekiston va Tojikiston harbiylarining ilk qo‘shma mashg‘ulotlari 2018-yil sentabrda Tojikistondagi “Chorrux—Dayron” o‘quv markazi bazasi va “Nurafshon” poligonida bo‘lib o‘tgan. 2019-yil sentabrda esa ikki davlat harbiylari Namangan viloyatidagi “G‘urumsaroy” poligonida shartli terrorchilarni yo‘q qilish bo‘yicha malakalarini oshirgan edi.
Izoh (0)