Toshkent viloyatida joriy yilning o‘tgan ikki oyi mobaynida 98 ta yo‘l transport hodisasi sodir bo‘lgan bo‘lsa, ularning 50 tasi piyoda urib yuborish holati kuzatilgan. Bu haqda Toshkent viloyati IIBB YHXB axborot xizmati xabar berdi.
Qayd etilishicha, viloyat hokimining farmoyishiga binoan 1-martdan 31-martga qadar “Piyodalar harakat xavfsizligi oyligi” o‘tkazilmoqda. Bu tadbirda asosiy e’tibor qoidabuzar piyodalarga qaratilmoqda. Tadbirning o‘tgan 10 kuni mobaynida 2454 ta qoidabuzar piyodalarga tegishli choralar ko‘rilgan.
“Har bir piyoda tomonidan sodir etilgan qoidabuzarlik yuzasidan O‘zbekiston Ma’muriy javobgarlik to‘g‘risidagi kodeksning 138-moddasiga ko‘ra ma’muriy bayonnomalar rasmiylashtirildi”, — deyiladi xabarda.
Avvalroq Toshkent viloyatida YPX inspektorlari 1 kunda 300 ga yaqin piyodani jarimaga tortgani haqda xabar bergan edik.
Izoh (0)