Samarqand shahrida MDH tashkilotiga a’zo davlatlar chegara qo‘shinlari rahbarlarining 5-mintaqaviy yig‘ilishi bo‘lib o‘tdi. Bu haqda Chegara qo‘shinlari axborot xizmati “Daryo”ga ma’lum qildi.
Uchrashuvda Rossiya, Qozog‘iston, Qirg‘iziston, Tojikiston va O‘zbekiston respublikalari delegatsiyalari, shuningdek, MDH chegara qo‘shinlari qo‘mondonlari kengashining muvofiqlashtiruvchi xizmati vakillari ishtirok etdi.
Tadbirda MDHga a’zo davlatlarning Afg‘oniston bilan tashqi chegaralaridagi vaziyat va uning yaqin kelajakdagi rivojlanish tendensiyalari tahlil qilindi. Xususan, Afg‘onistonning shimoliy chegara hududlaridagi vaziyat yuzasidan fikr almashildi.
Shu bilan birga, yig‘ilish ishtirokchilarning e’tibori jangarilar nazorati ostidagi hududlarda giyohvand moddalar ishlab chiqarish ko‘lami oshib borayotgani va giyohvandlik vositalarini “shimoliy yo‘nalish” bo‘yicha Markaziy Osiyo mintaqasidagi MDHga a’zo davlatlarning tashqi chegaralari orqali olib o‘tishga urinishlar bo‘layotganiga qaratildi.
Yig‘ilishda Hamdo‘stlik davlatlari hududiga xalqaro terroristik va ekstremistik tashkilotlarga aloqador shaxslarning kirib kelishiga qarshi kurash bo‘yicha chora-tadbirlar rejalari ishlab chiqildi.
Uchrashuv yakunlari bo‘yicha bayon rasmiylashtirildi. Tadbirdagi tavsiyalar 16-aprel kuni Yerevan shahrida bo‘lib o‘tadigan chegara qo‘shinlari qo‘mondonlari kengashining navbatdagi yig‘ilishida ko‘rib chiqiladi.
Izoh (0)