O‘zbekiston harbiy sudi Mudofaa vazirligi “Vatanparvar” gazetasining sobiq muxbiri Vladimir Kaloshinni umumiy tartibdagi koloniyada 12 yilga qamoq jazosiga hukm qilindi. “Gazeta.uz”ning xabar berishicha, bu haqda jurnalistning Rossiyada yashayotgan qizi Anastasiya Yepisheva ma’lum qilgan.
Uning aytishicha, sud jarayoni 7-fevral kuni yopiq tarzda o‘tkazilgan. Vladimir Kaloshinning o‘zi unga qo‘yilayotgan ayblovlarni tan olmayapti. Jurnalistni advokatlar Allan Pashkovskiy va Murod Sobirov himoya qilgan.
4-mart kuni bo‘lib o‘tgan oxirgi sud majlisida sud Vladimir Kaloshinni Jinoyat kodeksining 157-moddasi 1-qismida nazarda tutilgan jinoyat (Davlatga xoinlik qilish, ya’ni O‘zbekiston fuqarosi tomonidan josuslik, chet el davlatiga, chet el tashkilotiga yoki ularning vakillariga davlat sirlarini yetkazish yoxud O‘zbekistonga qarshi dushmanlik faoliyati olib borishda boshqacha yordam ko‘rsatish yo‘li bilan O‘zbekiston suverenitetiga, hududiy daxlsizligiga, xavfsizligiga, mudofaa salohiyatiga, iqtisodiyotiga zarar yetkazishga qaratilgan qasddan sodir etilgan qilmish)ni sodir etganlikda aybdor deb topgan. Ushbu moddada 10-yildan 20-yilgacha ozodlikdan mahrum etish jazosi belgilangan.
Anastasiya Yepisheva advokatlarning so‘zlariga asoslanib aytishicha, sud jarayoni protsessual qonunbuzarliklar bilan o‘tgan. Sudya tomonlarning majlisga tayyorlanish imkoniyatlarini hisobga olmagan holda, majlislarni juda tez o‘tkazgan.
Shuningdek, uning ta’kidlashicha, sud advokatlarning (hibsga olish) ehtiyot chorasini o‘zgartirish to‘g‘risidagi da’vosini qanoatlantirishdan bosh tortgan, bu muddat Toshkent harbiy sudining 2019-yil 21-sentabrdagi qaroriga binoan 2019-yil 1-dekabrda tugagan.
Umumiy hisobda, sudyani ishdan olish, ashyoviy dalillarni talab qilish va tekshirish, guvohlarni chaqirish va ekspertiza o‘tkazish kabi 10 dan ortiq da’volar rad etilgan. Dastlabki tergov organi tomonidan guvohlar deb ko‘rsatilgan so‘roq qilinganlar esa ayblovni tasdiqlovchi to‘g‘ridan to‘g‘ri yoki bilvosita dalillar keltirmagan.
Vladimir Kaloshinning qarindoshlari ham u hibsga olingan 2019-yil 2-iyuldan boshlab unga nisbatan qarindoshlari va do‘stlariga qarshi turli tahdidlar ko‘rinishida psixologik bosim o‘tkazib kelinganini aytgan.
28-fevral kuni advokat Allan Pashkovskiy mijozga nisbatan qiynoq va tahdidlar bo‘layotgani to‘g‘risida Bosh prokuror nomiga shikoyat arizasi yozgan. Vladimir Kaloshinning o‘zi esa bu haqda sudga yozma ravishda ma’lum qilgan va sud qarorida buni e’tiborga olishni, shuningdek, bu haqda Bosh prokurorni xabardor qilib, barcha zarur qonuniy choralar ko‘rishni so‘ragan.
Vladimir Kaloshin Lenin nomidagi Toshkent oliy umumqo‘shin qo‘mondonlik maktabini tamomlagan, shundan so‘ng u leytenant unvoni bilan Termizdagi Turkiston harbiy okrugiga yuborilgan. Baykalorti harbiy okrugida va Sovet kuchlarining Janubiy guruhida (Vengriya) xizmatni o‘tab bo‘lgach, SSSR parchalangandan so‘ng, Baykalorti harbiy okrugiga qaytgan. U yerda madaniy-ma’rifiy ishlar bilan shug‘ullangan va harbiy gazetalarga maqolalar yozgan.
1992-yilda esa Mudofaa vazirligiga qarashli “Vatanparvar” gazetasiga yuborilgan. 1992-yilning iyulidan boshlab gazetaning harbiy xizmat va o‘quv ishlari bo‘limi boshlig‘i lavozimida ishlab kelgan. Prezidentning 2000-yil 28-avgustdagi farmoni bilan “Shuhrat” medali bilan taqdirlangan. 2005-yil 7-noyabr kuni haqiqiy harbiy xizmatdan rezervga bo‘shatilib, Mudofaa vazirligi pensioneriga aylangan. 2007-yil 2-apreldan 2019-yil 2-iyulgacha hibsga olingunga qadar u “Vatanparvar” gazetasida sharhlovchi bo‘lib ishlagan.
Anastasiya Yepishevaning so‘zlariga ko‘ra, Vladimir Kaloshin rezervga o‘tkazilgandan so‘ng gazetada sharhlovchi sifatida ishlashda davom etagan bo‘lsa ham harbiy kiyim kiymagan va maxfiy ma’lumotlarga kirish huquqiga ega bo‘lmagan. Uning aytishicha, Kaloshin ikkinchi guruh nogironi va bronxial astma bilan kasallangan.
2020-yilning yanvarida davlatga qarshi xiyonat bo‘yicha ayblangan TIVning sobiq xodimi Qodir Yusupovga sud hukmi e’lon qilingandi.
Izoh (0)