Futbol bo‘yicha Angliya Premyer Ligasining 28-turidan o‘rin olgan “Manchester Siti” hamda “Arsenal” jamoalari o‘rtasidagi bellashuv noma’lum muddatga qoldirildi. Bu haqda APL rasmiy saytida xabar berildi.
Ta’kidlanishicha, 13 kun oldin, ya’ni 27-fevral kuni “Arsenal” Yevropa Ligasi doirasida “Olimpiakos” bilan to‘qnash kelgan. Grek klubi xo‘jayini Yevangelos Marinakis uchrashuvdan so‘ng “Arsenal” futbolchilari va klub shtabidagi bir necha kishi bilan aloqada bo‘lgan.
Oradan bir necha kun o‘tib, “Olimpiakos” xo‘jayini koronavirus bilan kasallangan. Shu boisdan APL rahbariyati “Arsenal”ning “Siti”ga qarshi uchrashuvini 11-mart kuni emas, balki boshqa muddatda o‘tkazish bo‘yicha qaror qabul qilgan. Hozircha ushbu o‘yinning qachon bo‘lib o‘tishi ma’lum emas.
Ma’lum qilinishicha, Yevangelos Marinakis bilan aloqada bo‘lgan “Arsenal” a’zolari 14 kunlik karantinga olingan. Shuningdek, APL boshqa o‘yinlarni qoldirish niyatida emasligini qo‘shimcha qilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)