Alibaba asoschisi Jek Ma Bloomberg talqiniga ko‘ra, Osiyoning eng boy odami deb topildi. Uning ushbu maqomni qo‘lga kiritishiga jahon bozorida neft narxining pasayishi va avvalgi eng boy milliarder hindistonlik Mukesh Ambanining 5,8 milliard dollar yo‘qotgani sabab bo‘ldi, deb yozmoqda “Kommersant”. Ambani Reliance Industries neft kompaniyasining egasi hisoblanadi.
Endi Ambani Osiyoda ikkinchi, butun dunyo milliarderlari reytingida 19-o‘rinni egallab turibdi, uning boyligi 41,8 milliard dollarga baholangan. Reliance Industries aksiyalari narxi 9-mart kuni 12 foizga, oxirgi bir yilda esa 26 foizga pastlagan. Jek Maning ham boyligi kamaygan, biroq u 44,5 milliard dollar mablag‘i bilan dunyoda 18-o‘rinni, Osiyoda esa 1-pog‘onani egallab turibdi. Garchi Alibaba kompaniyasi ham koronavirus tufayli jiddiy zarar ko‘rgan bo‘lsa-da, bulutli servislar va ilovalar yo‘nalishida daromadning o‘sishi ko‘zga tashlanmoqda.
9-mart holatiga ko‘ra, dunyodagi ko‘plab milliarderlarning boylik mablag‘lari qisqargan, bunga koronavirus tarqalishi tufayli kompaniya aksiyalari narxining tushib ketishi sabab bo‘lgan. Bloomberg Billionaires Index hisobotiga ko‘ra, dunyoning 500 nafar eng boy odamlarining umumiy boyligi 239 milliard dollarga qisqargan.
Izoh (0)