Tojikiston va O‘zbekiston rasmiy statistika ma’lumotlariga ko‘ra, mamlakatlar o‘rtasidagi savdo aylanmasi 2020-yil yanvar holati bo‘yicha deyarli ikki barobarga farq qilmoqda. Bu rezidentlar va norezidentlar o‘rtasida yuzaga keladigan tashqi savdo operatsiyalarini hisoblash metodologiyasi bilan bog‘liq, deb xabar beradi “Aziya-Plyus”.
Tojikiston statistika agentligining ma’lumotlariga ko‘ra, tojik—o‘zbek tovar aylanmasining umumiy hajmi yanvar oyida 22,8 million dollarni tashkil etgan. Ta’kidlanishicha, o‘tgan oyda O‘zbekistonga eksport 3,6 million dollardan ortiqni, import esa 19,2 million dollarni tashkil etgan.
Shu bilan birga, O‘zbekiston Davlat statistika qo‘mitasi yanvar oyida Tojikiston bilan ikki tomonlama savdo hajmi 41,3 million dollarga yetganini ma’lum qilgan. Xususan, Tojikistonga eksport hajmi 30 million dollarni, import esa 11,3 million dollarni tashkil qildi.
Tojikiston prezidenti huzuridagi statistika agentligining ta’kidlashicha, Tojikistonda, MDHning boshqa davlatlarida bo‘lgani kabi tashqi savdo statistikasi ham MDH davlatlararo statistika qo‘mitasining uslubiy tavsiyalari va Xalqaro valyuta jamg‘armasining “To‘lov balansi va xalqaro investitsion pozitsiya”si to‘g‘risidagi oltinchi nashri uslubiyati asoslangan.
“Tojikistonda tashqi savdo aylanmasi tovarlar va xalqaro xizmatlar bo‘yicha alohida shakllanadi. Statistika agentligi mamlakat bojxona xizmatining, ‘Barki Tojik’, ‘Pomirenerji’, ‘Tojiktransgaz’ kompaniyalarining import va eksport borasidagi rasmiy ma’lumotlariga tayanadi”, — deyiladi xabarda.
Biroq davlatlar o‘rtasidagi tashqi savdo aylanmasini tuzishda, oxirgi foydalanish borasida boshqa davlatlarga to‘g‘ri keladigan va mamlakat uchun tranzit xususiyatiga ega bo‘lgan tovarlar chiqarib tashlanadi.
Ta’kidlanishicha, xalqaro xizmatlarning eksporti va importi to‘g‘risidagi ma’lumotlar Tojikistonda ishlaydigan korxona va tashkilotlar taqdim etgan ma’lumotlar asosida tuziladi. Xususan, yuk va yo‘lovchilarni temir yo‘l, avtomobil va havo transporti orqali tashish xizmatlari, pochta aloqa xizmatlari, turoperatorlarning xizmatlari va boshqalar.
Izoh (0)