Imtiyozli toifadagi bemorlarga beriladigan orderlarni ajratishda shaffoflikni ta’minlash va navbat kutishlarni yo‘q qilish maqsadida tibbiy tanlov komissiyasi tarkibiga jiddiy o‘zgarishlar kiritilishi kutilmoqda. 21-fevral kuni Oliy Majlis Qonunchilik palatasi Fuqarolarning sog‘lig‘ini saqlash masalalari qo‘mitasi tomonidan o‘tkazilgan yig‘ilishda ta’kidlanishicha, kuchli jamoatchilik nazorati o‘rnatilishini davrning o‘zi taqozo qilmoqda.

Foto: Oliy Majlis Qonunchilik palatasi

“Daryo” muxbiri Mirolim Isajonovning xabar berishicha, tahliliy-tanqidiy ruhda kechgan tadbirda deputatlar va SSV rasmiylari order berish tartibiga oid bir qator takliflarni ilgari surishdi. Sog‘liqni saqlash vazirining birinchi o‘rinbosari Bahodir Yusupaliyev order aynan ehtiyojmand fuqarolarga ajratilishi va onlayn rejim yaratish lozimligini bildirdi.

“16 ta respublika ilmiy-amaliy tibbiyot markaziga davolanish uchun beriladigan orderlarni ajratish jarayoniga jamoatchilikni jalb etishimiz kerak. Jamoatchilik nazorati o‘rnatilsa, bu tizim ancha tartibga solinadi. Bu bo‘yicha vazirlik tomonidan tegishli ko‘rsatma beriladi va hududlardagi tibbiy-tanlov komissiyasi tarkibiga jamoatchilik vakillari, deputatlar kiritiladi.

Foto: Oliy Majlis Qonunchilik palatasi

Orderga haqiqiy muhtoj bo‘lgan bemorlarni aniqlab, ularning ro‘yxatini shakllantirish asosiy masalalardan biridir. Bu borada, avval, qo‘mita va vazirlik o‘rtasida qo‘shma dasturni ishlab chiqish tarafdoriman. Viloyat tibbiy-tanlov komissiyasi, ixtisoslashgan markazlar, vazirlik va qo‘mitaga ulangan onlayn tizim yaratilishi kerak. Shu orqali order olish uchun ro‘yxatda turgan insonlarni jamoatchilik kuzatib boradi. Buning uchun ozgina vaqt kerak, albatta. Muhimi bemor emas, uning hujjatlari elektron holatda harakatlanishi kerak. Ushbu tizimni yo‘lga qo‘yishda parlament a’zolari yaqindan ko‘maklashishini istardim”, — dedi Yusupaliyev.

Foto: Xalqaro press klub

SSV rasmiysining aytishicha, nafaqat fuqarolar, balki hokimlar ham profilaktik ko‘rikdan tez-tez o‘tmaydi.

“Hech kimga sir emas, ko‘pchilik o‘z sog‘lig‘iga bee’tibor bo‘ladi. Yotib qolsa, shifoxonaga boradi. Ungacha Xudo xohlasa, yaxshi bo‘ladi, deb yuraveramiz. Biz hozir yuqori texnologiya deymiz, u yetmayapti, bu yetmayapti, insult bo‘ldi, yotib qoldi, deymiz. Ungacha borish davrida nima qildingiz, degan savolga ko‘pchiligimiz javob berolmaymiz. Hokimlar bilan gaplashganimizda ‘O‘zingiz oxirgi marta profilaktik ko‘rikdan qachon o‘tdingiz?’ deyilsa, to‘g‘risini aytaman, 90 foizi o‘tmaganman, deydi. Shuning uchun ixtisoslashgan tibbiy yordamga yetgunga qadar birgalikda harakat qilib, ishlashimiz kerak.

Prezidentimiz ham yuqumli bo‘lmagan – infarkt, insult, onkologik kasalliklarning oldini olish bo‘yicha muhim chora-tadbirlar ko‘rish masalasini qo‘ydi. Bu ishni tegishli markazimiz bilan boshladik. Bundan tashqari, 40 yoshdan yuqori aholi o‘rtasida so‘rovnoma tarqatib, yuqumli bo‘lmagan kasalliklar qaysi omillar tufayli kelib chiqayotgani, qaysi sabablarni yo‘q qilishimiz va qanday tavsiyalar berishimizni atroflicha o‘rganmoqdamiz”, — dedi Bahodir Yusupaliyev.