“Tashqi reklama bozorini tartibga solish to‘g‘risida”gi Hukumat qarori qabul qilindi. Qarorga muvofiq, endi yer uchastkalaridagi tashqi reklama obyektlari uchun 10 yil muddatga, davlat mulki bo‘lgan bino va inshootlardagi tashqi reklama obyektlari uchun 5 yil muddatga DXMlar orqali reklama joylari pasportlarini berish bir martalik yig‘im summasini to‘lash orqali amalga oshiriladi.
Adliya vazirligining ma’lum qilishicha, yer uchastkasiga o‘rnatilgan video ekranli tashqi reklama obyektlari uchun ko‘rsatilgan muddat qo‘shimcha 10 yil muddatga uzaytiriladi.
Qonuniy o‘rnatilgan tashqi reklama obyektlarini mazkur qaror talablariga moslashtirish uchun 6 oy muddat berildi. Ushbu muddatda moslashtirilmagan reklama obyektlari egalari tomonidan ixtiyoriy ravishda o‘z kuchi bilan olib tashlanishi (aks holda bu ish sud tartibida amalga oshiriladi) belgilandi.
Shuningdek, 2020-yil 1-martdan boshlab Toshkent shahrida tashqi reklamani joylashtirish sohasidagi faoliyatning alohida tartibi joriy qilinadi. Bunda, tashqi reklama obyektlarini yer uchastkalarida joylashtirish huquqi (“E-ijro auksion” orqali) faqat yuqori texnologiyali tashqi reklama obyektlariga beriladi.
Qaror bilan tashqi reklama obyektlarini o‘rnatish taqiqlangan hududlar belgilandi. Jumladan, trotuar va piyodalar yo‘laklarida tashqi reklama obyektlarini o‘rnatish taqiqlanadi.
Qaror bilan tashqi reklama obyektlarini qurish tartibi, qurish uchun beriladigan yer, bino va inshootlar ro‘yxatini shakllantirish, qurish huquqini elektron auksion orqali berish tartibi to‘g‘risidagi nizomlar tasdiqlandi.
Avvalroq, poytaxt reklamachilarning Prezident Shavkat Mirziyoyevning tadbirkorlarni qo‘llab-quvvatlash so‘zlari va tadbirkorlar faoliyatiga aralashmaslik haqida “O‘zavtoyo‘l” davlat qo‘mitasiga qaratilgan chorlov aks etgan reklama bannerlari paydo bo‘lgani haqida xabar bergandik.
Izoh (0)