O‘zbekistonning AQShdagi Favqulodda va muxtor elchisi Javlon Vahobov Missisipi shtatida yangidan saylangan gubernator Teyt Rivz, shtatning sobiq gubernatori Fil Brayant hamda qishloq xo‘jaligi vaziri Endi Gibson bilan uchrashdi. Bu haqda O‘zA xabar berdi.
Uchrashuvga O‘zbekiston va Missisipi shtati o‘rtasidagi munosabatlarning joriy ahvoli va istiqboli bilan tanishish maqsadida AQShning mamlakatimizdagi Favqulodda va muxtor elchisi Deniyel Rozenblyum ham Toshkentdan maxsus yetib keldi.
Shu yilning yanvar oyida gubernator lavozimini egallagan Teyt Rivz boshchiligidagi yangi jamoa O‘zbekiston bilan savdo-iqtisodiy, investitsiyaviy, shuningdek xavfsizlik sohasidagi sheriklik aloqalarini kengaytirishda davom etishga tayyorligini alohida ta’kidladi.
Missisipining sobiq gubernatori Fil Brayant uning O‘zbekiston hukumati bilan hamkorlik bo‘yicha xizmatlari AQSh davlat departamenti tomonidan e’tirof etilganini bildirdi.
Qishloq xo‘jaligi vaziri Endi Gibson, o‘z navbatida, agrar sektordagi hamkorlik istiqbolini muhokama qilish maqsadida shtat Qonunchilik palatasi a’zolari va tegishli qo‘mita raisining O‘zbekistonga tashrifini tashkil etishda ko‘maklashishga tayyorligini bildirdi. Vazir, shuningdek O‘zbekiston tomoniga shtatning yetakchi parrandachilik kompaniyalari bilan ham uzviy aloqalarni yo‘lga qo‘yishga yordam beradi.
Hozirgi paytda O‘zbekiston va Missisipi shtati o‘rtasidagi munosabatlar yuqori o‘sish sur’atiga va keng qamrovga ega. Prezident Shavkat Mirziyoyevning 2018-yil sentabrda Missisipi Milliy gvardiyasi qo‘mondoni Jenson Boylz hamda ushbu shtatdan saylangan kongressmen Trent Kelli boshchiligidagi shtat delegatsiyasi bilan, 2019-yil may oyida esa gubernator Fil Brayant bilan uchrashuvi ikki tomonlama o‘zaro manfaatli aloqalarni sifat jihatidan yangicha bosqichga olib chiqishda burilish nuqtasi bo‘ldi.
Izoh (0)