Silk Road vizasi yil oxiriga qadar yo‘lga qo‘yilishi kutilmoqda

Xorijiy sayyohlarda Markaziy Osiyo mamlakatlari uchun umumiy viza joriy etishni ko‘zda tutuvchi Silk Road loyihasi 2020-yilning oxirigacha ishga tushirilishi mumkin. Bu haqda O‘zbekiston bosh vazirining o‘rinbosari — Turizmni rivojlantirish davlat qo‘mitasi raisi Aziz Abduhakimov 12-fevral kuni o‘tkazilgan matbuot anjumanida ma’lum qildi, deb yozadi “Gazeta.uz”.

2019-yilning avgust oyida O‘zbekiston Prezidenti Shavkat Mirziyoyev mamlakatda turizmni rivojlantirish bo‘yicha yo‘l xaritasini tasdiqladi.

Xususan, hujjat 2020-yilning fevral oyida Buyuk Ipak yo‘li mamlakatlarida sayohat qilayotgan sayyohlar uchun Silk Road yagona viza rejimini ishga tushirishni nazarda tutgan.

“Hammasi joyida. Yil oxiriga qadar bizda ushbu loyiha bo‘ladi”, — deydi Aziz Abduhakimov Silk Road vizasini joriy etish muddati haqidagi savolga javob berib.

Bosh vazir o‘rinbosarining qo‘shimcha qilishicha, yaqinda Qozog‘iston vakillari bilan muzokaralar olib borilgan hamda yangi loyihani ishga tushirishning tashkiliy-texnik masalalari ko‘rib chiqilgan.

“Biz hozirda juda samarali ish olib bormoqdamiz”, — deydi Aziz Abduhakimov.