Toshkentda YPX inspektori pora bilan qo‘lga tushdi

Joriy yil 6-fevral kuni fuqaro U.A.ning huquqni muhofaza qiluvchi organlarga qilgan murojaatiga asosan tezkor tadbir o‘tkazildi. Bu haqda IIV YHXBB axborot xizmati ma’lum qildi.

Tezkor tadbir davomida Toshkent shahar IIBB YHXB YPX brigadasi maxsus divizioni YPX inspektori A.B. fuqaro U.A.dan transport vositasini tegishli hujjatlarsiz boshqarganligi uchun jarima maydonchasiga joylashtirilgan Matiz rusumli avtomobilni chiqarib berish maqsadida tamagirlik yo‘li bilan 220 000 so‘mni pora tariqasida olayotgan vaqtda huquqni muhofaza qiluvchi organ xodimlari tomonidan ushlangan.

Mazkur holat yuzasidan YPX inspektori A.B.ga nisbatan O‘zbekiston Respublikasi Jinoyat kodeksining 210-moddasi 1-qismi bilan jinoyat ishi qo‘zg‘atilgan.

Hozirda holat yuzasidan tergovoldi surishtiruv ishlari olib borilmoqda.