Toshkentda piyodalar harakatini taqiqlovchi va tirbandlikni ko‘rsatuvchi yo‘l belgilari o‘rnatilmoqda

Toshkent shahrining uch joyida “Piyodalarning harakatlanishi taqiqlangan” 3.10 yo‘l belgisi o‘rnatildi. Bu haqda Toshkent shahar IIBB xabar berdi.

Ma’lum qilishicha, ushbu belgilar Mirzo Ulug‘bek tumani Sultoniya ko‘chasidagi yerosti yo‘lagi hamda Yunusobod dehqon bozoridagi yerosti yo‘lagi yonida va Shayxontohur tumanidagi Beruniy va Saqchisimon ko‘chalari kesishmasida (Chorsu bozori ro‘parasida) o‘rnatildi.

Yo‘l harakati qoidalarini tasdiqlash to‘g‘risidagi Vazirlar Mahkamasining 2015-yil 24-dekabrdagi qaroriga ko‘ra, 3.10 “Piyodalarning harakatlanishi taqiqlangan” yo‘l belgisi piyodalarning harakatlanishi ularning xavfsizligiga xavf tug‘dirishi mumkin bo‘lgan joylarda o‘rnatiladi.

Toshkent shahar IIBBning ma’lum qilishicha, Yunusobod tumanidagi Amir Temur va Osiyo ko‘chalari kesishmasida ogohlantiruvchi 1.32 “Tirbandlik” yo‘l belgisi o‘rnatildi.

Ta’kidlanishicha, ushbu belgi vaqtinchalik yoki chorrahalar oldida o‘rnatilgan o‘zgaruvchi tasvirli belgilarda, tirbandlik yuzaga kelgan hududni chetlab o‘tish imkoniyati bor joyda qo‘llaniladi.