Kattaqo‘rg‘on tumani “Mullatog‘ay” mahallasi hududida joylashgan “X.E.Z.” fermer xo‘jaligi raisi E.X xo‘jalik yer maydonidan fuqarolarga uy-joy qurish uchun yer ajratib berish vakolatiga ega bo‘lmasa ham, 2008—2019-yillar davomida shu ish bilan shug‘ullanib kelgan.
Jinoyat ishlari bo‘yicha Samarqand viloyat sudi sudyasi G‘ayrat Negmatovning “Daryo”ga ma’lum qilishicha, E.X. 2016-yilning noyabr oyida hamqishlog‘i B.Nag‘matovni aldab, unga “X.E.Z.” fermer xo‘jaligiga tegishli yerdan uy-joy qurish uchun 0,10 gektar yer ajratib berishni va’da qilgan.
Kelgusida tuman kadastrida ishlovchi mansabdor tanishlari orqali ushbu yerni fermer xo‘jaligi balansidan chiqarish haqidagi tuman hokimining qarorini chiqartirib berishini bildirgan. B.Nag‘matovning otasidan 800 AQSh dollari miqoridagi pullarni aldash yo‘li bilan qo‘lga kiritgan.
Bundan tashqari, 2017-yilning sentabr oyida fuqaro A.G‘afurovdan ham uy-joy qurish uchun yer ajratib berish va’dasi evaziga 1000 AQSh dollarini qo‘lga kiritgan.
Jinoyat ishlari bo‘yicha Kattaqo‘rg‘on tuman sudi raisi Temur Almamatov raisligida o‘tayotgan sud majlisida E.X.ga nisbatan Jinoyat kodeksining tegishli moddalari bilan qo‘zg‘atilgan jinoiy ish materiallari ko‘rib chiqilmoqda.
Izoh (0)