Samarqandda o‘smir qizning homilador bo‘lib qolishi ortidan barcha o‘quvchi qizlar tekshirilayotgani haqidagi xabarga izoh berildi

Ijtimoiy tarmoqlarda tarqalgan, bir tumanda o‘smir qizlarning homilador bo‘lib qolgani va buning oqibatida tumandagi barcha o‘quvchi qizlar tibbiy ko‘rikdan o‘tkazilayotgani to‘g‘risida xabar tarqaldi. Samarqand sog‘liqni saqlash boshqarmasi matbuot xizmati ushbu xabarga izoh berdi.

“Aholi o‘rtasida kasalliklarni erta aniqlash va dastlabki bosqichlarda bartaraf etish maqsadida Samarqand viloyatining nafaqat Tayloq tumani, balki, barcha shahar va tumanlarida tor soha xodimlari ishtirokida chuqurlashtirilgan tibbiy ko‘riklar tashkil etilmoqda.

2019-yil davomida viloyat profilaktika-davolash muassasalari, tuman va shahar tibbiyot birlashmalarining mutaxassislari tomonidan maktabgacha ta’lim va ta’lim muassasalari hamda uyushmagan aholi o‘rtasida 200 dan ortiq tibbiy ko‘riklar tashkil etilib, jami 3 million 299 ming 622 nafar fuqaro tibbiy ko‘rikdan o‘tkazildi. Ulardan 1 million 193 ming 539 nafari 1 yoshdan 18 yoshgacha va 2 million 106 ming 83 nafari 18 yoshdan katta fuqarolardir”, — deyiladi xabarda.