2020-yilda o‘tgan yili yuzaga kelgan inflyatsiya bilan bog‘liq ayrim ko‘rinishlarga barham berilishi va oziq hamda nooziq-ovqat tovarlar narxining ortiqcha oshmasligi kutilmoqda. Markaziy bank tomonidan tayyorlangan sharhda shu haqda so‘z boradi, deya xabar beradi Spot.
Buning sabablaridan biri sifatida ichki narxlar Markaziy Osiyodagi va asosiy savdo sheriklaridagi narxlarga sezilarli darajada tenglashib bo‘lgani aytilmoqda. 2020-yilda inflyatsiya 12—13,5 foiz atrofida prognoz qilinayotgani, 2019-yilda esa bu ko‘rsatkich 15 foizdan oshgani ham shu bilan izohlanadi.
Undan tashqari, iqtisodiyot kreditlanishining o‘sishi sekinlashadi va nominal YaIM o‘sishi (20—25 foiz) darajasida bo‘lishi kutilmoqda. Bu iqtisodiyotda ehtiyoj haddan ortiq o‘sishining oldini oladi va shu tariqa inflyatsiya va almashuv kursiga bosimni kamaytiradi.
Uchinchidan, milliy valyuta almashuv kursining kutilayotgan barqarorlashuvi 2019-yilga nisbatan joriy yilda inflyatsiya jarayonlariga kamroq ta’sir ko‘rsatadi.
To‘rtinchidan, qishloq xo‘jaligi, to‘qimachilik va qurilish sanoatida ishlab chiqarish hajmining o‘sishi ichki ehtiyoj qondirilishiga olib keladi. Ichki bozorda raqobatning kengayishi esa mazkur sohalarda narxlar barqarorlashishida muhim rol o‘ynaydi.
Beshinchidan, 2020-yilda prognoz qilinayotgan aholi daromadlari, jumladan, o‘rtacha ish haqining mo‘tadil o‘sishi ehtiyojning inflyatsiya bilan bog‘liq omillari ta’siri kamayishiga turtki beradi.
Izoh (0)