Majburiy ijro byurosi faoliyatini tartibga soluvchi me’yoriy hujjatlarda kam ta’minlangan oilalar uchun imtiyoz yoki alohida tartib belgilanmagan. Biroq joylarda byuro xodimlari tomonidan bu jarayonga insonparvarlik tamoyili bilan yondashib kelinmoqda. Bu haqda “Daryo” muxbiri Azizbek Abduvaliyev xabar bermoqda.
MIB Namangan viloyati boshqarmasi boshlig‘i Dilmurod Umaraliyevga ko‘ra, viloyatda o‘tgan yil noyabr—dekabr oylari davomida shahar va tuman bo‘limlari tomonidan 136 ta kam ta’minlangan, ehtiyojmand oilaning salkam 63 million so‘m qarzdorligi hududda yashovchi tadbirkorlar, saxovatpesha kishilar yordamida to‘lab berildi.
Jumladan, Namangan shahri “Atangan guzar” mahallasida yashovchi Tojixon Umrzoqovaning elektr energiyasidan bo‘lgan 700 ming so‘m qarzdorlik homiylar tomonidan to‘lab berildi.
Chust tumani “Sabzazor” mahallasida istiqomat qiluvchi Oyshabi Karimova boquvchisi yo‘qligi, yashash sharoiti ko‘ngildagidek emasligi tufayli homiy tomonidan elektr uchun 500 ming so‘m to‘lov qilib berildi.
Uchqo‘rg‘on tumani “Shaldirama” mahallasida yashovchi Xolisxon Valiyevaning elektr energiyasidan 350 ming so‘m qarzdorligi bor edi. Hududga biriktirilgan davlat inspektorining mahalla faollari bilan hamkorligi natijasida ushbu oilaning qarzdorligi hal qilindi.
Shu tumanning “Qozoqovul” mahallasida istiqomat qiluvchi Sohibovlar xonadonining ham elektr energiyasidan bo‘lgan 520 ming so‘m qarzdorligi homiylar yordamida to‘lab berildi.
— Bunday misollarni yana ko‘plab keltirish mumkin. Asosiysi, bu kabi tadbirlar davom ettirilmoqda, — deydi Dilmurod Umaraliyev.
Izoh (0)