AQShning elektromobillar ishlab chiqaruvchi Tesla kompaniyasining bozor qiymati ilk bor muayyan vaqt davomida 100 milliard dollardan qimmatroq bo‘lib turdi. Bu haqda Reuters xabar qilgan.

Foto: Habr

21-yanvardagi birja savdolarida Tesla’ning bitta aksiyasi narxi 555,1 dollargacha ko‘tarildi, kompaniya umumiy kapitali esa 110,1 milliard dollarga yetdi. 22-yanvardagi savdolarda bitta aksiya narxi 547,2 dollargacha tushdi, umumiy kapital esa 98,6 milliardga teng bo‘ldi.

Bloomberg’ning yozishicha, Tesla aksiyalari kompaniyaning 2019-yil uchinchi choragida Xitoyda zavod ochishi natijasida erishgan muvaffaqiyatlari sabab qimmatlashgan. Reuters’ning qayd etishicha, Tesla kompaniyasining qiymati Ford va General Motors avtokonsernlari kapitali birlashtirilsa ham ulardan qimmatroq bo‘ladi.

Agar Tesla asoschisi Ilon Mask kompaniya kapitalini yana 100 milliard dollarga yetkaza olsa va ushbu qiymatni yarim yil davomida ushlab tursa, unga 346 million dollar miqdorida mukofot puli beriladi, deb yozgan Bloomberg hamda Reuters.

22-yanvardagi birja savdolari davomida Tesla aksiyalari yana oshib, kompaniya kapitalining miqdori 100 milliard dollardan ko‘paydi.

2018-yil bahorida Ilon Mask Tesla’dagi maoshining oshkora hisoblab borilishidan voz kechgan. Shundan beri uning mukofot pullari kompaniyaning moliyaviy natijalariga bog‘liq holda belgilanadi va to‘lanadi.

2018-yil avgust oyida Mask Twitter’dagi akkauntida hazillashib Tesla aksiyalarini 420 dollardan xarid qilishga tayyorligini bildirgan (o‘shanda kompaniya qimmatli qog‘ozlarining narxi 350 dollardan hisoblanardi). Qimmatli qog‘ozlar va birjalar bo‘yicha AQSh komissiyasi Mask o‘sha tviti bilan bozor ishtirokchilarini chalg‘itishga uringani uchun unga nisbatan 20 million dollar jarima jazosi tayinlagan, ushbu harakat tufayli Ilon Tesla direktorlar kengashi rahbari lavozimidan ketgandi. Hozirda Mask kompaniyani bosh direktor sifatida boshqarib kelmoqda.

Oxirgi sakkiz oy ichida Tesla’ning aksiyalari uch baravarga qimmatlashdi. 2020-yil 13-yanvarda qimmatli qog‘ozlarning bir donasining narxi ilk bor 500 dollarga chiqdi.