16-yanvar kuni “Nijniy Novgorod–Arzamas–Saransk–Issa–Penza–Saratov” trassasida Saratov viloyati hududida yuz bergan yo‘l-transport hodisasi oqibatida O‘zbekiston fuqarolari halok bo‘lgani haqida xabar berilgan edi.
FVV matbuot xizmatining xabar berishicha, O‘zbekiston va Rossiya Favqulodda vaziyatlar vazirliklari hamda Tashqi ishlar vazirligi, uning hududiy konsullik xizmati xodimlari tomonidan voqeaga aniqlik kiritish maqsadida, o‘zaro ma’lumotlar almashinuvi olib borildi.
Unga ko‘ra joriy yilning 16-yanvar kuni mahalliy vaqti bilan soat 08:20 da Rossiya Federatsiyasi Saratov viloyati Tatishev tumani hududidan o‘tuvchi federal ahamiyatga ega bo‘lgan R-158 “Nijniy Novgorod—Arzamas—Saransk—Issa—Penza—Saratov” avtomobil yo‘lining 580 kilometrda Polchaninovka aholi yashash punktidan 30 km shimoliy-g‘arbiy yo‘nalishda “Volga-GAZ-3110” avtomobili hamda Hyundai miniven avtomobili ishtirokida yo‘l-transport hodisasi sodir bo‘lgan.
Buning oqibatida, jami 9 nafar fuqarolar tan jarohati olgan. Shulardan 4 nafar fuqaro voqea joyida vafot etgan. Ma’lumot o‘rnida qayd etish joizki, vafot etgan fuqarolarning ikki nafari O‘zbekiston fuqarosi bo‘lgan. Shuningdek, 5 nafar fuqarolar turli darajadagi tan jarohatlari bilan Saratov shahar viloyat klinik kasalxonasiga yotqizilgan. Ularning 3 nafari o‘zbekistonliklar bo‘lgan.
Yo‘l-transport hodisasi konsullik xizmati xodimlari tomonidan olib borilgan tezkor harakatlar natijasida halok bo‘lgan va jabrlangan fuqarolarning shaxsiga aniqlik kiritildi:
Vafot etgan O‘zbekiston Respublikasi fuqarolari:
Boltabayev Nodir, 1979-yilda tug‘ilgan (Farg‘ona viloyati Quvasoy shahrida istiqomat qilgan).
Sobirov Sardorbek, 1997-yilda tug‘ilgan (Farg‘ona viloyati Bog‘dod tumanida istiqomat qilgan).
Tan jarohati olgan O‘zbekiston Respublikasi fuqarolari:
Muhamedova Gulorom, 1968-yilda tug‘ilgan (Samarqand viloyati Samarqand shahrida istiqomat qiladi).
Ibatov Sunnat, 1989-yilda tug‘ilgan (Qashqadaryo viloyati, Qarshi shahrida istiqomat qiladi).
Balliyev Isa, 1998-yilda tug‘ilgan (Qoraqalpog‘iston Respublikasi Xo‘jayli tumanida istiqomat qiladi).
Mazkur holat yuzasidan huquqni muhofaza qiluvchi organlari tomonidan tergovoldi surishtiruv ishlari olib borilmoqda. Shuningdek, vafot etgan fuqarolarning qarindoshlariga xabar berish va jasadlarini “O‘zbekiston havo yo‘llari” MAK aviatransporti orqali O‘zbekistonga olib kelish hamda tan jarohati olgan fuqarolarga tegishli tibbiy yordam ko‘rsatish bo‘yicha hamkorlikda ishlar olib borilmoqda, deyiladi xabarda.
Izoh (0)