Axborot va ommaviy kommunikatsiyalar agentligi bosh direktori Komil Allamjonov Shavkat Mirziyoyev qarori bilan Jinoyat kodeksidan tuhmat va haqorat uchun ozodlikdan mahrum etishni chiqarib tashlash bo‘yicha qonun loyihasi ishlab chiqilganini ma’lum qildi.
Komil Allamjonov Telegram’dagi rasmiy kanalida ma’lum qilishicha, qonun-loyihasi muhokama uchun normativ-huquqiy hujjatlar loyihalari portaliga joylandi.
Avvalroq AOKA bosh direktori Komil Allamjonov Prezident Konstitutsiya va qonun ustuvorligini ta’minlashga qaratilgan qaror imzolagani va hujjatda agentlik zimmasiga muhim vazifalar yuklatilganini ta’kidlagandi.
Qonun qabul qilinsa, agentlik zimmasiga bir qator muhim vazifalar yuklatiladi. Xususan:
- Tuhmat va haqorat uchun ozodlikdan mahrum qilish bilan bog‘liq bo‘lgan normani bekor qilish masalasi ko‘rib chiqiladi;
- Sud tizimida shaffoflikni va jamoatchilik nazoratini yanada kuchaytirish maqsadida jurnalistlar va fuqarolarning ochiq sud majlislarida ishtirok etishi, sudlarning veb-saytlari va matbuot kotiblari ishini yaxshi tashkil qilish bo‘yicha Oliy sud Plenumining qarori qabul qilinadi;
- Hamon og‘ir ahvolda qolayotgan bosma nashrlar borasida — davlat organlari muassis bo‘lgan bosma OAVni kuchaytirish, tahririyat xodimlarining mehnatiga haq to‘lashni yaxshilash hamda bosma nashrlar veb-saytlarini rivojlantirishga qaratilgan Hukumat qarori loyihasi ishlab chiqiladi;
- “Teleradioeshittirishlar to‘g‘risida”gi qonun ishlab chiqiladi va “Ommaviy axborot vositalari to‘g‘risida”gi qonunga o‘zgartishlar kiritiladi. Shu jumladan, tele va radiostansiyalarga litsenziya berish jarayoni soddalashtiriladi hamda davlat organlari va mansabdor shaxslarning jurnalistlarga nisbatan noqonuniy xatti-harakatlari yoki qarorlaridan himoya qilish tizimi kuchaytiriladi;
- O‘zbekistondagi barcha davlat organlari faoliyatining ochiqligini, ularning OAV bilan aloqalarini kuchaytirish bo‘yicha choralar ishlab chiqamiz.
Izoh (0)