Bag‘dod shimolidagi AQSh harbiy xizmatchilari joylashgan Et-Taji harbiy bazasi raketalar hujumiga uchradi. Bu haqda Reuters harbiylarning rasmiy bayonotiga tayanib xabar berdi.
Jabrlanganlar va halok bo‘lganlar haqida ma’lumot yo‘q. “Al-Xadat” telekanalining ma’lum qilishicha, harbiy bazaga qarata zalp o‘t ochuvchi tizimdan jami beshta raketa uchirilgan.
Mazkur holat bo‘yicha javobgarlikni hozircha hech kim bo‘yniga olgani yo‘q. Iroqdagi harbiy obyektga uyushtirilgan hujum so‘nggi ikki kun ichidagi ikkinchi hujum hisoblanadi — 12-yanvar kuni Balad bazasi o‘qqa tutilishi oqibatida to‘rt nafar iroqlik harbiy jarohat olgandi.
Eslatib o‘tamiz, 3-yanvar kuni AQSh Bag‘dod aeroporti yaqiniga bergan aviazarba oqibatida Eron islom inqilobi muhofizlari korpusi “Al-Quds” maxsus bo‘linmasi generali Qosim Sulaymoniy halok bo‘lgan. Iroq hukumati hujum haqida oldindan ogohlantirilganini ma’lum qilgan. Voqeadan keyin Iroq parlamenti mamlakat hududidan xorijlik harbiylarni chiqarib yuborishga ovoz berdi. Keyinchalik Pentagon AQShning Iroq hududidan harbiylarni olib chiqib ketish niyati yo‘qligini bildirgan. AQSh mudofaa vaziri Mark Esper Iroq harbiylarni mamlakatdan chiqarish bo‘yicha rasmiy shaklda yozma murojaat kelib tushmaganini ta’kidlagan.
Mavzuga doir: Bag‘dod shahridagi “yashil hudud” yana o‘qqa tutildi
Izoh (0)