Surxondaryo viloyat hokimi To‘ra Bobolov 12-yanvar kuni O‘zbekiston DXX Chegara qo‘shinlariga qarashli harbiy qism bo‘linmasining yangi binosining ochilish marosimida ishtirok etdi. Bu haqda Surxondaryo viloyati hokimligining axborot xizmati xabar bergan.
Barcha qulayliklarga ega bo‘linma binosi foydalanishga topshirildi. Shu munosabat bilan tashkil etilgan tantanali tadbirda davlat va jamoat tashkilotlari vakillari, faxriylar, harbiy xizmatchilar va bir guruh yoshlar ishtirok etdi. Unda viloyat hokimi, harbiy-ma’muriy sektor rahbari To‘ra Bobolov, harbiy qism komandiri o‘rinbosari, podpolkovnik Abdug‘ani Mengliqulov so‘zga chiqqan.
Yangi binoni qurib, jihozlash uchun 1 milliard 200 million so‘mdan ortiq mablag‘ sarflandi. Keng, shinam yotoqxonalar, barcha qulayliklarga ega oshxona, sport zal, o‘quv xonasi, hammom, dam olish xonalari, avtosaroy qurildi. Bino atrofi obodonlashtirilib, mevali, manzarali daraxt va turli gul ko‘chatlari ekildi. Tantanali tadbir davomida harbiy xizmatchilarning jangovar tayyorgarligiga bag‘ishlangan ko'rgazmali mashg'ulotlar, kontsert dasturi namoyish etildi. Mehmonlar yangi binolarni ko'zdan kechirib, harbiy xizmatchilarning jangovar shayligini oshirish, yashash va dam olishlari uchun yaratilgan sharoitlar bilan yaqindan tanishdi.
Shuningdek, viloyat axborot xizmatining xabarida, Termiz shahri yaqinida, Amudaryoning qoq o‘rtasida qamishzor, to‘qayzor va qumlardan iborat katta olamdan ajralgan o‘ziga xos tabiat mo‘jizasi joylashgani, maydoni taxminan 4 ming gektarlik sathga ega, uzunligi 8, eni 5-6 kilometr bo‘lgan bu orolda turfa hayvonlar erkin, yovvoyi holda yashashi, UNESCO’ning tabiat yodgorliklari ro‘yxatiga kiritilgan ushbu hudud payg‘ambarlardan birining ramziy qabri joylashgan manzil sifatida qadrlanishi qayd etilgan.
“Orolning “Payg'ambar oroli” nomini olishi ham shundan — bu yerda Qur’oni karimda zikr etilgan yigirma besh payg‘ambardan biri, miloddan avvalgi VI-VII asrlarda yashab o‘tgan Zul-Kifl (“kafolat sohibi” ma’nosini bildiradi) alayhissalom maqbarasi mavjud. XVII asrda yashagan balxlik mashhur qomusiy olim Mahmud ibn Valiy “Sirlar dengizi” asarida payg‘ambar Zul-Kifl alayhissalom dafn etilgan Termiz yaqinidagi bu orol Hakim Termiziy bilan Hizr alayhissalomning uchrashuv joyi bo‘lganini qayd etadi.
Oroldagi “Zul-Kifl” maqbarasi turli davrlarda bunyod etilgan gumbazli katta masjid va janubdan tutashgan sag‘anali xilxona hamda g‘arb tomondan biriktirilgan ikki xonadan iborat. Masjid murabba’ tarhli, oldi peshtoqli, bezagi g‘isht chorgul va archa tarzida terilgan,mehrobiga ganch girih naqsh ishlangan. Maqbara 2018-yil boshida qayta ta’mirlanib, obod holga keltirildi. Ushbu orol qo‘shni Afg‘onistonga tutash bo‘lgani bois chegarachilar tomonidan qo‘riqlanadi”, – deyiladi xabarda.
Izoh (0)