“Hududgaz Samarqand” mas’uliyati cheklangan jamiyati mansabdor shaxslari o‘z vakolatini suiiste’mol qilib, iste’molchisi aniqlanmagan noreal qarzdorlik 363 milliard 155 million 500 ming so‘m bo‘lishiga yo‘l qo‘yib, davlat manfaatlariga katta miqdorda zarar yetkazgan. Bu haqda “Daryo”ga MIB Samarqand viloyat boshqarmasi axborot xizmati xabar bermoqda.
Ma’lum qilinishicha, Samarqand viloyati bo‘yicha hududiy gaz ta’minoti filiali mansabdor shaxslari tomonidan 2019-yilning yanvar-oktabr oylarida viloyatda faoliyat ko‘rsatayotgan 46 ta AGTKSh larga umumiy hisobda 2.497.608 metr/kub hajmdagi tabiiy gaz noqonuniy berilgan. “O‘ztransgaz” va “Hududgazta’minot” aksiyadorlik jamiyatlari mansabdor shaxslari tomonidan tegishli tartibdagi ruxsatnomasiz amalga oshirilgan ish natijasida o‘zgalarning 842 million 854 ming so‘mlik, ko‘p miqdordagi mulki rastrata yo‘li bilan talon-toroj qilingan.
MIB Samarqand viloyati boshqarmasi tomonidan 84 ta avtomobillarga gaz to‘ldirish kompressor shoxobchalari (AGTKSh) bo‘yicha 2019-yil yanvar-oktabr oylari davomida sotilgan tabiiy gaz miqdori shartnomalari ko‘zdan kechirilganda “Tabiiy gaz yetkazib berish va qabul qilish to‘g‘risida”gi qo‘shimcha shartnomalar tuzmagan holda jami 24.101.102 metr/kub hajmdagi tabiiy gaz limitdan ortiq iste’mol qilingani aniqlangan. Natijada jami 8 milliard 651 million 258 ming so‘m miqdorda to‘lovlar kam hisoblangan.
Mazkur holat yuzasidan Bosh prokuratura huzuridagi Majburiy ijro byurosi Samarqand viloyati boshqarmasi tomonidan “Hududgaz Samarqand” mas’uliyati cheklangan jamiyati mansabdor shaxslariga nisbatan Jinoyat Kodeksining 167-moddasi 3-qismi “A” bandi (o‘zganing mulkini o‘zlashtirish yo‘li bilan juda ko‘p miqdorda talon-toroj qilish) va 205-moddasi 2-qismi “A” bandi (mansab vakolatini suiiste’mol qilish yo‘li bilan juda ko‘p miqdorda zarar yetkazish) bilan jinoyat ishi qo‘zg‘atilib, tegishliligi bo‘yicha Samarqand viloyati prokuraturasiga tergov harakatlarni o‘tkazish uchun yuborilgan.
Izoh (0)