Birlashgan arab amirliklarining Dubay shahrida Globe Soccer Awards taqdimot marosimi bo‘lib o‘tdi.
Ushbu marosimda yilning eng yaxshi futbolchisi sifatida “Yuventus” hujumchisi Krishtianu Ronaldu e’tirof etildi. Portugaliyalik futbolchi bu borada Lionel Messi (“Barselona”), Muhammad Saloh va Virjil van Deyk (ikkisi “Liverpul”) kabi futbolchilarni orta qoldirdi.
“2019-yilning eng yaxshi murabbiyi” sovrini “Liverpul” ustozi Yurgen Kloppga nasib etdi. Germaniyalik mutaxassisga Fernandu Santush (Portugaliya terma jamoasi) va Erik ten Xag (“Ayaks”) raqobatchi bo‘lgandi.
“Yil kashfiyoti” sifatida “Atletiko” hujumchisi Joau Feliks topildi. Portugaliyalik futbolchi Anssumane Fati (“Barselona”), Erling Holand (“Zalsburg” / “Borussiya D”) va Jeydon Sanchodan (“Borussiya D) ustun kelgan.
Yilning eng yaxshi ayol futbolchisi nomiga Angliya terma jamoasi vakili Lyusi Bronz loyiq ko‘rilgan bo‘lsa, yilning eng yaxshi yosh arab o‘yinchisi sovriniga “Borussiya D”da harakat qilayotgan Ashraf Hakimi ega chiqdi.
Shuningdek yana bir qator nominatsiyalarda g‘oliblar aniqlandi:
Yilning eng yaxshi darvozaboni — Alisson Bekker
Yilning eng yaxshi hakami — Stefani Frappar (Fransiya)
Yilning eng yaxshi klubi — “Liverpul”
Yilning eng yaxshi arab klubi — “Al-Hilol” (Saudiya Arabistoni)
Yilning eng yaxshi futbol akademiyasi — “Ayaks” va “Benfika”
Yilning eng yaxshi futbol agenti — Jorje Mendesh
Yilning eng yaxshi arab futbolchisi — Abdurrazoq Hamdulloh (Marokash)
Futboldagi muvaffaqiyati faoliyat uchun — Rayan Gigz
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)