Samarqandda qiziga tegajog‘lik qilgan shaxsni urib o‘ldirgan ota 17 yilga qamaldi
2019-yilning yozida hamshishasini temir bo‘lagi bilan urib o‘ldirgan erkak 17 yilga ozodlikdan mahrum etildi. Bu haqda “Daryo” muxbiri Farhod Norbo‘tayev xabar bermoqda.
2019-yilning 2-iyul kuni soat taxminan 13:30 atrofida giyohvandlik moddasi iste’mol qilib, mast bo‘lgan Shukrullo Xurramov Urgut tumani “G‘oyibota” mahallasidagi yashash uyida tanishi Ziyodullo Xoliqnazarov bilan birga spirtli ichimlik iste’mol qilgan. Aroqqa gazagi qolmaganidan so‘ng, Shukrulla Xurramov gazak olib kelish maqsadida “Beshkapa” mahallasidan jigar pishirtirib olib kelish uchun uyidan chiqib ketgan.
Shukrullo Xurramovning yo‘qligidan foydalanmoqchi bo‘lgan Ziyodullo Xoliqnazarov uning yolg‘iz uxlab yotgan qizi K.T.ga tegajog‘lik qilmoqchi bo‘lganda u uyg‘onib xonadan tashqariga qochib chiqib ketgan.
Tashqariga chiqqan K.T. choyxonadan qaytib kelayotgan otasi Shukrullo Xurramovni ko‘rib, unga Ziyodullo Xoliqnazarov tegajog‘lik qilganligini aytgan. Xurramov tanishining xatti-harakatlaridan g‘azablanib, spirtli ichimlik iste’moli ta’sirida og‘ir darajadagi mastlik holatida bo‘lgan Ziyodullo Xoliqnazarovni temir bo‘lagi bilan tanasining turli sohalariga bir necha marotaba urib, jarohat yetkazgan. Natijada u olgan tan jarohatlari tufayli hodisa joyida vafot etgan.
Mavzuga doir: Samarqandda rashk tufayli xotinini pichoqlab o‘ldirgan 30 yoshli erkak 19 yilga qamaldi
