Maktablarda qishki ta’til qachondan boshlanishi ma’lum qilindi

Mamlakatdagi umumiy o‘rta ta’lim maktablarida 2019—2020-o‘quv yilining ikkinchi choragi yakunlanishi munosabati bilan beriladigan ta’til 28-dekabrdan boshlanadi. Bu haqda Xalq ta’limi vazirligi xabar berdi.

Umumiy o‘rta ta’lim maktablarida qishki ta’til 2019-yilning 28-dekabridan boshlanib, 2020-yilning 10-yanvar kuni yakunlanadi.

“2020-yilning 11-yanvaridan uchinchi chorakning birinchi kuni boshlanadi”, — deyiladi xabarda.

Avvalroq Oliy va o‘rta maxsus ta’lim vazirligi O‘zbekistonda 22-dekabrda o‘tkaziladigan saylov munosabati bilan talabalarning qishki ta’til muddati o‘zgarishi mumkinligi haqida xabar bergan edi. Talabalar o‘zi doimiy ro‘yxatdan o‘tgan yashash joyida ovoz berishlari uchun 2019/2020-o‘quv yili qishki ta’til davri 2019-yil 20-dekabrdan 2020-yil 6-yanvargacha etib belgilanishi kutilayotgani ma’lum qilingan edi.