Ijtimoiy tarmoqlarda xorijiy oliy ta’lim muassasalarida tahsil olayotgan o‘zbekistonlik talabalarni zudlik bilan ko‘chirib kelish, o‘qishni ko‘chirish uchun imtihonlar pullik bo‘lgani va shunga o‘xshash hech qanday asosga ega bo‘lmagan noto‘g‘ri ma’lumotlar tarqatildi. Bu haqda Oliy va o‘rta maxsus ta’lim vazirligi ma’lum qildi.
“Feyk” axborotlar oqimi vazirlik kanalida noqonuniy tarzda abituriyentlardan hujjatlar qabul qilinayotgani va shu kabi qonunga zid holatlardan aholini ogohlantirish maqsadida ma’lumotlar e’lon qilingandan so‘ng kuchaydi. Bunday yolg‘on xabarlarga vazirlik rasmiy telegram kanalining havolasi qo‘yilishi ortidan ayrim fuqarolar ularga ishonib qolmoqda, vazirlikka og‘zaki, yozma va internet orqali murojaatlar soni ko‘paymoqda.
“Xorijda tahsil oladigan talabalar va ularning ota-onalariga shuni rasman ma’lum qilamizki, xorijiy oliy ta’lim muassasalaridan o‘qishini O‘zbekiston Respublikasi oliy ta’lim muassasalariga ko‘chirish va ko‘chirib qayta tiklash tartibiga hech qanday o‘zgartirish kiritilgani yo‘q! Bu bo‘yicha barcha jarayonlar Vazirlar Mahkamasining 2017-yil 20-iyundagi “Oliy ta’lim muassasalariga o‘qishga qabul qilish, talabalar o‘qishini ko‘chirish, qayta tiklash va o‘qishdan chetlashtirish tartibi to‘g‘risidagi nizomlarni tasdiqlash haqida”gi 393-sonli qarori asosida amalga oshiriladi”, — deyiladi xabarda.
Joriy yil 28—30-avgust kunlari xorijiy oliy ta’lim muassasalaridan o‘qishni ko‘chirish va ko‘chirib qayta tiklash bo‘yicha murojaat qilgan nomzodlar uchun masofaviy onlayn test sinovlari o‘tkazildi. 2020—2021-o‘quv yili uchun sinovlar kelgusi yilda bo‘lib o‘tadi. 2019-yilda o‘qishni ko‘chirish va ko‘chirib qayta tiklash bo‘yicha imtihonlar o‘tkazilmaydi!
Xalqaro tan olingan tashkilotlarning oliy ta’lim muassasalari reytingida birinchi 1000 talik ro‘yxatdan joy olgan Rossiya Federatsiyasi oliy ta’lim muassasalarida ta’lim olayotgan talabalarning arizalariga muvofiq ularning o‘qishi Davlat komissiyasi qarori bilan O‘zbekiston Respublikasi oliy ta’lim muassasalariga sinovlar (test, yozma ish)siz to‘lov-kontrakt asosida ko‘chiriladi.Bu turkumga kiruvchi OTMlarda tahsil oladigan talabalar ham 2020-yilning 15-iyulidan 5-avgustga qadar murojaat qilishi kerak.
Talabalar o‘qishini ko‘chirish uzrli sabablarga ko‘ra (respublikaning bir hududidan ikkinchi hududiga doimiy yashash uchun yoki turmushga chiqish munosabati bilan turmush o‘rtog‘i doimiy yashaydigan (pasport bo‘yicha doimiy ro‘yxatdan o‘tgan) hududga ko‘chib o‘tganda, turmush o‘rtog‘i yoki ota-onasi harbiy xizmat o‘tash joyini o‘zgartirganda, yoxud ota-onasi (turmush o‘rtog‘i) xorijdagi davlat xizmatidan qaytganda) bahorgi semestrda o‘quv mashg‘ulotlari boshlanishidan oldin ham amalga oshirilishi mumkin.
Bunda o‘qishini ko‘chirish bo‘yicha ariza topshirish har yili 20-dekabrdan keyingi yilning 20-yanvarga qadar, o‘qishini ko‘chirish bo‘yicha arizani ko‘rib chiqib, qaror qabul qilish har yili 25-yanvardan 15-fevralga qadar amalga oshiriladi.
Izoh (0)