2009-yilning 16-iyunida Irlandiyaning Slaygo grafligida yashovchi Artur Slaygo Rosses-Poynt qishlog‘i yaqinidagi sohilga o‘g‘li bilan yugurishga kelgan vaqtida suv to‘lqinlari qirg‘oqqa olib chiqib tashlagan erkak jasadini ko‘rib qoladi. Keyinchalik erkakning Piter Bergmann ekani aniqlangan, biroq uning nima sababdan vafot etgani hozirgacha internet olami foydalanuvchilarini qiziqtirib keladi. Erkakning o‘limidan avvalgi kunlari qanday o‘tganini u yurgan va yashagan joylardagi kameralar yordamida aniqlashga urinib ko‘rildi, biroq to‘plangan ma’lumotlar sirli o‘lim yuzasidan surishtiruv jarayonini yanada chigallashtirdi.
Sirli Piter Bergmann
2009-yil 12-iyunda Slaygo shahridagi kameralar soat 18:28 da Olsterdan avtobusda kelgan oriq kishini tasvirga tushirgan. Avtobusdan tushgan erkak yelkasiga sumka osgan va qo‘lida sport sumkasini ko‘targandi. Bergmann taksi to‘xtatib Sligo City Hotel mehmonxonasiga borgan va 65 yevro evaziga u yerdan xona ijaraaga olgan. Ro‘yxatdan o‘tgan vaqtida u o‘zini Piter Bergmann deb tanishtirgan va Venada Aynshtettern ko‘chasi 15-uyda yashashini bildirgan.
Ertasi kuni u mahalliy pochta bo‘limiga borib, u yerdan sakkizta marka va aviapochta stikerlarini xarid qilgan. 14-iyun yakshanba kuni esa Piter ko‘chada taksi to‘xtatib, cho‘milish uchun yaqin atrofdagi sohil bo‘yiga borgan. Taksichi uni Rosses-Poyntga eltib qo‘ygan. Atrof-muhitni tomosha qilgan erkak o‘sha avtomobilning o‘zida Slaygoga qaytgan.
15-iyunda Piter Bergmann soat 13:06 da qora sumka va binafsharang polietilen paketini ko‘tarib ko‘chaga chiqqan. 13:38 da Kueysayd ko‘chasidagi savdo markaziga kelib, u yerda tushlik qilgan. Tushlikdan keyin erkak cho‘ntagidan chiqqan g‘ijimlangan qog‘ozlarni o‘qib, yirtib tashlagan va ahlatga uloqtirgan. Bir soatdan keyin Piterni Rosses-poynt plyajida sayr qilayotganini ko‘rishgan.
Guvohlar erkakning suv bo‘yida qaqqayib turgani va kech tushishini poylaganini bildirgan. 16-iyun 06:45 da Artur Kinsell va uning o‘g‘li sohil bo‘yida Piter Bergmanning murdasini ko‘rgan. Irlandiya politsiyasi ishni besh oy davomida tergov qilgan va bir nechta tafsilotni o‘rgangan, ushbu ma’lumotlar ushbu holatning sirliligini yanada oshirgan.
Janob Bergmanning sirlari
Piter Bergmann atrofdagi odamlar bilan deyarli muloqot qilmagan, lekin guvohlar uning yengil nemis lahjasida gapirganini ma’lum qilgan. Erkakning yonidan hujjatlar va pullar topilmagan. Kiyimning yozuvlari va shtrix-kodlari qo‘pol ravishda qirqib olingan. Patologoanatomlar erkakning 55 – 65 yoshda bo‘lgani, unda prostataning rivojlanayotgan saratoni va suyak o‘simtasi borligini aniqlagan. Jasad tekshirilganda murdaning qiynoqqa solingani yoki qotillik tufayli o‘ldirilgani bo‘yicha alomatlar aniqlanmagan.
U bir necha marta yurak xurujiga uchragan va bitta buyrakli odam bo‘lgan. Piter kuchli og‘riqlar ta’sirida yurgan bo‘lsa ham hech qanday dorilarni qabul qilmagan. Barmoq izlariga qarab shaxsni aniqlashga urinishlar ham besamar ketgan. Piter Bergmann chegarada ro‘yxatdan o‘tmagan va Irlandiyaga qonuniy yo‘l bilan kelmagan, Aynshtetterndagi 15-uy o‘rnida esa hech nima yo‘q.
Kameralar oxirgi kunlarda uning 13 marta mehmonxonadan chiqqani va har safar binafsharang paket bilan ko‘chaga chiqib usiz ortga qaytganini ko‘rsatmoqda. Ushbu kunlar davomida Bergmanning paketni qayoqqa tashlagani kameralar nigohidan chetda qolgan. Politsiya erkakning kameralarning ojiz nuqtasini juda yaxshi bilganligini ta’kidlagan. Ish bilan shug‘ullangan Terri Makmaxon uning sobiq politsiyachi yoki harbiy bo‘lganini taxmin qilgan. Bergmann ayrim holatlarda kamera tasvirlariga tushishni istamagan bo‘lishi mumkin.
Politsiya ahlatxonalarni ham tekshirib chiqdi va ishga aloqador ashyoviy dalillar topa olmadi. Bergmanning marka sotib olganidan keyin sakkizta xatni kimga yuborgani ham noma’lumligicha qolmoqda. Inspektor Rey Malderrig ham sirli o‘lim yuzasidan fikr bildirib, ishning o‘ta chigal ekanligini qayd etgan.
Tarixda qolish
Piter Bergmanni hodisasi Reddit nashrining ko‘plab postlari va odamlarning ularga bildirgan munosabat-u taxminlari bilan tarixda qoldi. Eng ommaviy sharhlar va taxminlarda erkakning maxsus xizmat vakili, jinoyatchi yoki zamonlar osha sayohat qiluvchi olim ekani bildirilgan.
2013-yilda rejissor Kiran Kessidi “Piter Bergmanning oxirgi kunlari” nomli hujjatli filmni suratga oldi va unda sirli ishning barcha tafsilotlarini yoritishga harakat qildi. Ushbu filmdan keyin ijtimoiy tarmoqlar ko‘plab internet-surishtiruvlari va podkastlarga to‘lib ketdi, barchasida odamlar Piter Bergmanning kim bo‘lganligi yuzasidan o‘z fikrlarini bildirardi. Hech kimga sezdirmay, tinchgina o‘lishni istagan odamning bunday shov-shuvli muhokamalarga sabab bo‘lgani g‘alati.
Izoh (0)