Albaniyadagi zilzilada bosh vazirning kelini ham halok bo‘lgani ma’lum qilindi

Albaniyada 26-noyabr, seshanba kuni kuzatilgan zilzila oqibatida qurbon bo‘lgan aholi vakillarining soni 50 nafarga yetdi, deb yozmoqda mahalliy Koha nashriga asoslanib “Korrespondent.net”.

“Qutqaruv operatsiyalari yakuniga yetdi. Zilzilada halok bo‘lganlarning yana ikki nafari Dyurresi hududidan topildi. Shu tariqa tabiiy ofat oqibati qurbonlarining soni 50 nafarga yetdi”, — deyiladi xabarda.

24 nafar odamning jasadi Durresdan, yana 24 jasad Tumandan va ikki nafar qurbon Kurbindan topilgan.

26-noyabrda ro‘y bergan zilzila oqibatida mamlakat bosh vaziri Edi Ramining bo‘lajak kelini ham halok bo‘lgan. Ushbu xabarni Albaniya hukumati rahbarining ofisidagilar rasman tasdiqlagan.

Rami o‘g‘lining qaylig‘i bo‘lgan Kristi Rechi ota-onasi va akasi bilan zilzila vaqtida binoning qulashi oqibatida halok bo‘lgan.

Asosan Tiranadan 36 kilometr uzoqlikda joylashgan Durres port-shahri zilziladan ko‘proq talafot ko‘rgan.