O‘zbekiston Respublikasi davlat bayrog‘i qabul qilingan kun munosabati bilan Buxoro Yoshlar markazi binosi Yoshlar ittifoqi viloyat kengashi tomonidan eni 55 metr, balandligi 12 metrga teng bo‘lgan O‘zbekiston bayrog‘i bilan o‘raldi. Bu haqda “Daryo” muxbiri xabar berdi.
Ark qo‘rg‘onidan Favvoralar maydonigacha bo‘lgan 11 kilometr masofani bosib o‘tgan yoshlar va aholidan iborat ko‘ngillilar, shuningdek, harbiy orkestrlar, milliy gvardiya otliqlari, badiiy jamoalar va estrada xonandalari Buxoro Yoshlar markazi binosi oldida to‘plandi.
Marsh davomida karting va mototsikllar namoyishi tashkil etildi. Maydon 50 mingdan ortiq odamlar bilan gavjum bo‘ldi. Tantana ijodiy jamoalarning chiqishlari bilan to‘planganlarga ko‘tarinki kayfiyat ulashdi.
Ushbu maydon tunda bayroq timsolida turli ranglardagi yoritish chiroqlari bilan jilolanadi. Tadbir O‘zbekiston Respublikasi Davlat bayrog‘i qabul qilinganining 28 yilligi munosabati bilan tashkil etildi.
Izoh (0)