Toshkent shahridagi Muqim yashash joyiga ega bo‘lmagan shaxslarni reabilitatsiya qilish markazida daydi mushuklar uchun uycha ochildi. Mushukkent loyihasining maqsadi shahar ichki ishlar bo‘limlarida mushuk uychalari o‘rnatish hisoblanadi. Uychalar ichki ishlar organlari kuzatuvi ostida bo‘ladi. Bu haqda Facebook’dagi Mushukkent guruhida ma’lum qilindi, deb yozmoqda “Anhor.uz”.
Guruh tomonidan berilgan xabarda aytilishicha, ko‘cha mushuklari uchun uychalar yaratish shahar urbanistikasidagi xalqaro format hisoblanadi. Bunday uychalar Turkiya, Singapur, Janubiy Koreya va Rossiyaning bir qator shaharlarida qurilgan. Ko‘plab shaharlarda esa bunday uychalar diqqatga sazovor joylar hisoblanadi.
Toshkentdagi mushuk uychalari shahar IIBB qo‘riqlovi ostida bo‘ladi, uychalarga va unda yashovchilarga zarar yetkazish qonunga asosan javobgarlikka sabab bo‘ladi.
Qayd etilishicha, daydi hayvonlar bosqichma-bosqich emlanadi, sterilizatsiya qilinadi va hisobga olinadi. Hujjatlar IIBBda, nusxalari esa xohishga ko‘ra aholi qo‘lida saqlanadi.
Uychalarga qarash, ularni tozalash esa uychalarning shartli egalari tomonidan amalga oshiriladi va bunda ularga qo‘riqlash bo‘yicha barcha zarur hujjatlar taqdim etiladi.
Izoh (0)