Xotin-qizlar qo‘mitasi xodimlari Qashqadaryodan Toshkentga o‘g‘irlab kelingan chaqaloqning ota-onasiga qaytarilishiga yordam ko‘rsatdi. Bu haqda qo‘mita matbuot xizmati xabar berdi.
Ta’kidlanishicha, Xotin-qizlar qo‘mitasining Jismoniy va yuridik shaxslar murojaatlari bilan ishlash bo‘limi boshlig‘i Ozoda Islomovaning qabuliga o‘zini “qashqadaryolikman” deya tanishtirgan ayol qo‘lida kichkina bola bilan kirib kelgan va o‘z muammolarini tushuntira boshlagan.
Suhbat jarayonida ayolning o‘zini tutishi, bolaga nisbatan o‘ta sovuqqon ekanligi va yoshi kattaligi, bolani avvaliga o‘z farzandim deb tanishtirib, keyin esa birovning bolasi deyishi, savollarga uzuq-yuluq javoblar berishi shubha uyg‘otgan. Ozoda Islomova vaziyatga oydinlik kiritish maqsadida Qashqadaryo viloyatiga qo‘ng‘iroq qilib, ayol haqida ma’lumot so‘ragan.
Ma’lum bo‘lishicha, ushbu ayol aslida ruhiy kasal bo‘lib, haqiqatan ham bola uniki bo‘lib chiqmagan. Ayol singlisining farzandini ikki kun oldin o‘g‘rilab, Toshkentga kelgan.
“Shu kunning o‘zidayoq Qashqadaryo viloyati xotin-qizlar qo‘mitasi raisi tezkor chora ko‘rib, ayol va bola uchun mashina yuborgan. Bolakay onasining qo‘liga sog‘-omon topshirildi. Xasta ayol esa davolanishi uchun shifoxonaga yotqizildi”, — deyiladi xabarda.
Izoh (0)