Moliya vazirligi huzuridagi byudjetdan tashqari Pensiya jamg‘armasi ijro etuvchi apparati tomonidan Toshkentda soxta hujjatlar bilan pensiya olib kelayotgan fuqaro aniqlandi. Bu haqda Pensiya jamg‘armasi matbuot xizmati “Daryo”ga xabar berdi.
Qayd etilishicha, 30-sentabr kuni Toshkent shahar, Mirobod tumanida yashovchi fuqaro B.B. tomonidan hech qanaqa rasman ishlamagan turmush o‘rtog‘ining hujjat soxtakorligi bilan shug‘ullanib, katta miqdordagi pensiya olib kelayotganligi haqidagi ma’lumotlar bayon qilingan yozma murojaati kelib tushgan.
Ijro etuvchi apparat xodimlari tomonidan mazkur murojaat yuzasidan O‘zbekiston Respublikasining “Jismoniy va yuridik shaxslarning murojaatlari to‘g‘risida”gi qonuni 19-moddasida belgilab qo‘yilgan talablaridan kelib chiqqan holda, axborotning davlat organlari, tashkilotlar xodimlari va ular mansabdor shaxslari tomonidan oshkor etilishiga yo‘l qo‘yilmasligi haqida ariza muallifiga tegishli javob xati yo‘llandi.
Ammo, Toshkent shahar, Mirobod tumanida yashovchi fuqaro B.B.ning turmush o‘rtog‘i B.F.ning yoshga doir pensiya ishi Ijro etuvchi apparatning malakali mutaxassislari tomonidan qayta o‘rganib chiqildi. Aniqlanishicha, haqiqatdan ham fuqaro B.F.ga 2008-yilning 7-avgustidan e’tiboran, taqdim qilgan hujjatlariga asosan 35 yillik ish staji hisobidan yoshga doir pensiya tayinlangan bo‘lib, uning pensiya miqdori 2019-yilning 1-avgustidan 1,1 million so‘mni tashkil qilgan.
Fuqaro B.F.ning taqdim qilgan pensiya hujjatlari bo‘yicha Farg‘ona viloyati Yozyovon tuman davlat arxivida saqlanayotgan Farg‘ona viloyati “Qishloqxo‘jalikkimyo” AJning 1975—1993-yillardagi ish stajlari hamda uning mazkur korxonadan 1982—1986-yillarda to‘langan oylik ish haqlari to‘g‘risidagi ma’lumotlari shuningdek, 1993—2004-yillardagi mehnat faoliyati davrlari Toshkent shahar Yakkasaroy tumanidagi “Sunur servis” MChJ saqlovidagi buyruqlar kitobi hamda oylik maoshlar kitobidan solishtirib o‘rganildi. Fuqaro B.F.ning ismi-sharifi hamda unga tegishli ma’lumotlar ham o‘z tasdig‘ini topmaganligi natijasida, fuqaroga 71,9 million so‘m miqdoridagi pensiya to‘lovi amaldagi qonunchilikka zid ravishda to‘langanligi aniqlandi hamda yoshga doir pensiya ishi o‘rganish kunida rad etildi.
Hozirgi kunda, fuqaro B.F. tomonidan o‘zlashtirilgan 71,9 million so‘mdan 32,1 million so‘mi Jamg‘arma hisobiga fuqaro tomonidan ixtiyoriy ravishda qaytarilgan bo‘lib, o‘tkazilgan o‘rganishlar yuzasidan to‘plangan tekshirish materiallari va hujjatlar huquqiy baho berish uchun huquqni muhofaza qilish idoralariga taqdim qilindi, deyiladi xabarda.
Izoh (0)