O‘zbekiston Prezidenti Shavkat Mirziyoyev ShHTga a’zo davlatlar Hukumat rahbarlari kengashi majlisida ishtirok etish uchun mamlakatga amaliy tashrif bilan kelgan Tojikiston bosh vaziri Qohir Rasulzodani qabul qildi, deb xabar berdi Prezident matbuot xizmati.
Davlat rahbari mehmonni samimiy qutlar ekan, O‘zbekiston bilan Tojikiston o‘rtasidagi do‘stlik va yaxshi qo‘shnichilik munosabatlari izchil rivojlanib borayotgani, ikki davlat rahbarlarining birgalikdagi sa’y-harakatlari bilan strategik sheriklik darajasiga ko‘tarilganini katta mamnuniyat bilan qayd etdi.
Qohir Rasulzoda O‘zbekiston Prezidentiga har doimgidek samimiy qabul uchun chuqur minnatdorlik bildirib, Tojikiston Prezidenti Emomali Rahmonning salomi va eng ezgu tilaklarini yetkazdi.
Uchrashuvda siyosiy, savdo-iqtisodiy, energetika, transport, madaniy-gumanitar sohalar va boshqa ustuvor yo‘nalishlarda erishilgan oliy darajadagi kelishuvlarni o‘z vaqtida va to‘liq hajmda amalga oshirish muhimligi qayd etildi.
Chegaradosh hududlar o‘rtasidagi hamkorlikni kengaytirish masalalariga alohida e’tibor qaratildi.
Mintaqaviy hamkorlikning dolzarb masalalari ko‘rib chiqildi.
Shuningdek, Shavkat Mirziyoyev Shanxay hamkorlik tashkilotiga a’zo davlatlar Hukumat rahbarlari kengashi majlisi doirasida poytaxtda bo‘lib turgan Belarus bosh vaziri Sergey Rumasni ham qabul qildi.
Davlat rahbari mehmonni samimiy qutlar ekan, so‘nggi yillarda oliy darajada o‘zaro ishonchga asoslangan muloqot yo‘lga qo‘yilgani tufayli O‘zbekiston va Belarus o‘rtasidagi do‘stlik va ko‘p qirrali hamkorlik munosabatlari prinsipial jihatdan yangi darajaga ko‘tarilganini ta’kidladi.
Sergey Rumas O‘zbekiston Prezidentiga iliq qabul uchun minnatdorlik bildirib, Belarus Prezidenti Aleksandr Lukashenkoning salomi va ezgu tilaklarini yetkazdi.
Uchrashuvda o‘zaro hamkorlikni kengaytirish va iqtisodiyotning turli tarmoqlarida istiqbolli kooperatsiya loyihalarini ilgari surishdan, shuningdek, hududlararo aloqalar va madaniy-gumanitar almashinuvni mustahkamlashdan ikki tomon ham manfaatdor ekani qayd etildi.
Joriy yil avgust oyiga Belarusga amalga oshirilgan oliy darajadagi rasmiy tashrif yakunida erishilgan kelishuvlar va imzolangan bitimlarni keng ko‘lamda amalga oshirish muhim ekani ta’kidlandi.
Izoh (0)