Germaniyaning Veymar shaharchasi hokimligi ovqatlanish shoxobchalarida Döner kebab (donar-kabob) so‘zini ishlatishni taqiqladi. Buning o‘rniga nemislar Drehspies in Fladenbrot, ya’ni “non orasidagi grilda pishgan go‘sht” mazmunidagi so‘zni aytishni taklif qilgan. Bu haqda “Izvestiya” xabar berdi.

Foto: “Tourprom.ru”

Veymar hokimligi ushbu qarorni 20 yil avval qabul qilingan ishlab chiqarishga oid hujjat asosida chiqargan. Hokimlik ishlab chiqqan normativ hujjatda donarning bo‘laklarga ajratilgan qo‘y yoki mol go‘shti qiymasidan tayyorlanishi belgilab qo‘yilgan. Shuningdek, ushbu mahsulotlarda go‘sht miqdori 60 foizni tashkil qilishi lozim. Boshqa masalliqlar ham reglament bilan belgilab qo‘yilgan: donar-kabobga faqat tuz, ziravorlar, tuxum, piyoz, yog‘, sut yoki yogurt qo‘shilishi mumkin. Biroq shaharchadagi hamma oziq-ovqat shoxobchalari ham ushbu qoidalarga bo‘ysunmaydi.

Endi yangi qarorga ko‘ra Veymardagi barcha shoxobchalar “peshonasi”dagi yozuvlardan ham “donar” so‘zi olib tashlanadi.

Donar 1972-yilda Berlinda turkiyalik Qodir Nurman tomonidan o‘ylab topilgan. U qurilishda ishlovchi ishchilarning tezda tushlik qilishini ta’minlash maqsadida non orasiga pishgan go‘sht solib ovqatlanayotganini kuzatib, tez tayyorlanadigan non orasidagi kabobni ixtiro qilgan.