Al-Arabiya telekanali cho‘ponlarning mamlakatning g‘arbiy qismiga yashirib qo‘yilgan 25 million AQSh dollari miqdoridagi IShID tashkilotiga tegishli xazinani topib olganligini xabar qildi, deb yozmoqda “RIA Novosti”.
Xabarga ko‘ra, Anbar viloyatidagi cho‘ponlar terrorchilar cho‘l hududiga yashirib qo‘ygan umumiy qiymati 25 million AQSh dollariga teng bo‘lgan pullar, oltin va kumushni topib olgan.
Avvalroq Al-Bag‘dodiyni yo‘q qilish yuzasidan operatsiyada AQSh koalitsiyasiga axborot bergan josus IShID rahnamosining ishonchli odami bo‘lgani va barcha harakatlarni undan qasos olish maqsadida amalga oshirgani va bu uchun 25 million AQSh dollari miqdorida mukofot olishi haqida xabarlar tarqalgan.
Washington Post nashri ushbu sirli shaxsning Abu Bakr al-Bag‘dodiyning Idlib viloyatida qishloqdan qishloqqa ko‘chishini ham tashkillashtirganini yozgan. Nashrning qayd etishicha, xabar beruvchi Amerika razvedkasiga nafaqat Bag‘dodiy yashiringan uy manzilini, balki hujum vaqtida bilish juda zarur bo‘lgan xonalar rejasini ham taqdim qilgan.
Josus IShID rahnamosiga shu qadar yaqin odam bo‘lganki, AQSh harbiy operatsiyalar o‘tkazgan vaqtda ham Bag‘dodiyning yonida yurgan, lekin talafot ko‘rmagan. Dunyodagi birinchi raqamli terrorchi o‘lganidan ikki kun o‘tgach, josus va uning oilasi xavfsiz yerga ko‘chirilgan.
Mavzuga doir: Tortinchoq bola, ayollarni zo‘rlovchi, birinchi raqamli terrorchi. IShID yetakchisi Abu Bakr al-Bag‘dodiyning hayot yo‘li
Avval Bag‘dodiy yashiringan manzilni uning yordamchilaridan biri orqali topilgani yoki IShID rahnamosini uning xotinlaridan biri sotganligi haqidagi taxminlar borligi xabar qilingandi.
26-oktabrda AQSh harbiylari 26-oktabr kuni Suriyada IShID terroristik tashkiloti yetakchisi Abu Bakr al-Bag‘dodiyga qarshi maxsus operatsiya o‘tkazilgani va terrorchining dushman qo‘liga tushmaslik uchun o‘zini portlatib yuborgani xabar qilingan, keyinchalik AQSh prezidenti Donald Tramp Iroq, Suriya, Amerika, Rossiya, Turkiya va kurdlarga operatsiyadagi hamkorlik uchun minnatdorchilik bildirgan va Bag‘dodiyning “itdek o‘lim topgani”ni qayd etib, ma’lumotni rasman tasdiqlagandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)