Andijon viloyati Oltinko‘l tumanining Jalabek qishlog‘ida uyi buzilgan fuqarolarga yer va kompensatsiya pullari hokimiyat tomonidan bir necha yildan beri berilmayapti. Bu haqda “Sevimli” telekanalining “Zamon” axborot dasturida namoyish etilgan lavhada hikoya qilinadi.
Lavhada ta’kidlanishicha, qishloqda 83 ta uy buzilishga tushgan va ularning kompensatsiya pullari to‘liq to‘lab berilmagan hamda yer ajratilmagan. Fuqarolarning o‘zida mablag‘ yo‘qligi sababli ular yangi uy qura olmayapti.
Qishloqda yashovchi Nasiba Qo‘ziboyevaning so‘zlariga ko‘ra, besh yildan beri ushbu muammo yechimsiz qolmoqda.
“Qo‘shtepa” mahalla fuqarolar yig‘ini raisining aytishicha, Oltinko‘l tumani hokimi fuqarolarga to‘rt sotixdan yer ajratib berishni rejalashtirgan va bu ishlarni tuman paxta rejasini bajarganidan keyin amalga oshirish ko‘zlanmoqda.
Oltinko‘l tuman hokimligining yer resurslari va davlat kadastri bo‘limi rahbari Muhiddin Akbarovning ma’lum qilishicha, mazkur mahalladagi uyi buzilgan aholining muammolari tuman yer berish komissiyasi tomonidan o‘rganilmoqda va ularning muammolari tez kunlarda hal qilinadi.
Izoh (0)