“E” guruhi
Guruh yetakchisi “Napoli” Avstriyaga safar qildi va “Zalsburg” bilan bahs olib bordi. Ta’kidlash joiz, mazkur o‘yin neapolliklar uchun oson kechmadi. Ikki bor ortda qolayotgan maydon egalari hisobni tenglashtirishga muvaffaq bo‘ldi. Biroq oxir-oqibat tajriba o‘z so‘zini aytdi va Karlo Anchelotti shogirdlari uch ochkoga ega chiqdi. Mazkur bahsda “Zalsburg”ning 19 yoshli hujumchisi Erling Holand dublga erishgan holda Chempionlar Ligasi to‘purariga (6 ta gol) aylandi. Shuningdek, mazkur o‘yinda Dris Mertens “Napoli”dagi gollari soni (116) bo‘yicha Diyego Maradonadan (115) o‘zib ketdi.
Guruhning keyingi o‘yinida “Liverpul” “Genk” maydonida mehmon bo‘ldi. O‘yinda kutilganidek amaldagi chempion osonlik bilan g‘alabani qo‘lga kiritdi. O‘tgan mavsumni jarohat sabab o‘tkazib yuborgan Aleks Oksleyd-Chemberlen dublga erishdi, futbolchi ushbu musobaqada so‘nggi bor bir yarim yil avval gol urgandi. Sadio Mane va Muhammad Saloh esa bir martadan o‘z hisoblariga gol yozdirib qo‘ydi.
Guruhda 7 ochko bilan “Napoli” yetakchilikni davom ettirmoqda, undan bir ochko kam jamg‘argan “qizillar” keyingi o‘rinni egallab turibdi.
“F” guruhi
So‘nggi vaqtlarda o‘zining yuqori formasiga chiqib borayotgan “Barselona” Pragaga bordi. O‘yindan avval “Slaviya” yaqqol autsayder sifatida e’tirof etilayotgandi, biroq chexiyaliklar klubi bu safar ham mo‘jiza ko‘rsatishiga biroz omad yetishmadi xolos. “Barselona” 3-daqiqadayoq Lionel Messining golidan keyin oldinga o‘tib oldi va shundan keyin biroz hotirjamlikka berildi. Buni mezbonlar ikkinchi bo‘lim boshida jazolashga muvaffaq bo‘ldi, biroq oradan ko‘p vaqt o‘tmay yoqimsiz rikoshet sabab, maydon egalari darvozasi yana ishg‘ol etildi. O‘yin yakunlanishi arafasida pragaliklar bosimni oshirdi, ammo “ko‘k-anorranglilar” posboni bir necha vaziyatda jamoasini qutqarib qolishga erishdi.
Guruhning ikkinchi uchrashuvida “Inter” klubi o‘z maydonida “Borussiya Dortmund” bilan to‘qnash keldi. O‘yin teng kurashlar ostida kechgan bo‘lsa-da, milanliklar vaziyatlardan unumli foydalana oldi. Lautaro Martines va Antonio Kandrevaning gollari Antonio Konte jamoasiga suv va havodek zarur bo‘lgan uch ochkoni taqdim etdi.
Mazkur g‘alabadan keyin “Inter” ochkolarini 4 taga yetkazib olgan holda dortmundliklarga yetib oldi. Ulardan uch ochko ko‘p jamg‘argan “Barselona” guruhda peshqadam bo‘lib turibdi.
“G” guruhi
Mazkur guruhdagi vaziyat tobora qiziqarli tus olmoqda. Ikki yetakchi jamoaning bu turdagi mag‘lubiyatidan so‘ng ushbu kvartetda teng kuchli jamoalar yig‘ilganini bilib olish qiyin emas. 2-turdan keyin 4 ochko bilan peshqadamlik qilayotgan “Zenit” safarda “Leypsig” bilan bahs yuritdi. Dastlab Yaroslav Rakitskining golidan keyin oldinga o‘tib olgan ruslar ikkinchi bo‘limda o‘z darvozasidan ikkita to‘p olib chiqdi.
Guruhdagi ikkinchi o‘yinda “Benfika” dramatik bahsda “Lion”dan ustun keldi. O‘yin avvalida oldinga chiqib olgan lissabonliklar 70-daqiqaga kelib o‘z darvozalaridan to‘p o‘tkazib yubordi. O‘yinning asosiy vaqti yakunlanishiga besh daqiqa qolganida Pitssi mezbonlarga g‘alaba keltirgan golga muallif bo‘ldi.
3-turdan so‘ng “Leypsig” 6 ochko bilan guruh peshqadamiga aylandi. Undan keyin to‘rt ochkodan jamg‘argan “Zenit” va “Lion” bormoqda. Ushbu turda mavsumdagi ilk ochkosini qo‘lga kiritgan “Benfika” so‘nggi pog‘onani band etgan.
“H” guruhi
Turning markaziy o‘yinlaridan biri mazkur guruh vakillari “Ayaks” va “Chelsi” o‘rtasida kechdi. Tajriba va yoshlik shijoatini o‘zida uyg‘unlashtirgan jamoalar o‘rtasidagi to‘qnashuv ko‘pchilikni befarq qoldirmadi. O‘yin tezkor va hujumlarga boy bo‘lgani bilan hisob kamtarona ko‘rinish oldi. Dastlabki bo‘limda amsterdamliklar faolroq ko‘rindi, biroq tanaffusdan so‘ng “Chelsi” o‘z o‘yiniga temp qo‘sha oldi. Ayniqsa Frenk Lempardning amalga oshirgan o‘zgarishlari o‘yin natijasini hal qilib berdi. Zaxiradan maydonga tushgan Kristian Pulishich va Mishi Batshuayilarning harakatlaridan keyin hisob ochildi. Bu gol uchrashuvda yagonaligini saqlab qoldi.
Guruhdagi narigi o‘yin keskinlik borasida birinchisidan qolishmadi. “Lill” o‘z maydonida “Valensiya”ni qabul qildi. Uchrashuvda maydon egalari tashabbusga ega bo‘ldi, biroq ispanlar sanoqlik imkoniyatlardan birini gol bilan yakunlashga muvaffaq bo‘ldi. Shundan keyin tashabbus butkul fransuzlar tomoniga o‘tdi, ketma-ket hujumlar 95-daqiqaga kelib o‘z samarasini berdi va “Lill” ushbu mavsumdagi ilk ochkosiga ega bo‘ldi.
Guruhda “Chelsi” va “Ayaks” 6 ochko bilan peshqadamlik qilmoqda. “Valensiya” esa (3) uchinchi o‘ringa tushib ketdi.
Nodirxon Hamidxonov tayyorladi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)