Turkmaniston—O‘zbekiston chegarasidan maxfiy yuklar ortilgan furalar o‘tgani xabar qilindi

“Xronika Turkmenistana” nashri to‘rtta katta yuk avtomobilining Turkmanistondagi “Forob” hamda O‘zbekistondagi “Olot” chegara punktlari orqali qatnovni amalga oshirganini xabar qildi.

Xabarga ko‘ra ushbu furalarning yo‘l hujjatlarida “Tekshirish taqiqlanadi” muhrlari urilgan. Ushbu yo‘l hujjatlar Turkmaniston prezidenti Gurbanguli Berdimuhammedovning opasi va mamlakat Qizil yarim oy milliy jamiyatining rahbari Gulnabat Dovletovaning imzosi va tashkilot muhri bilan rasmiylashtirilgan. Ammo nashrning qayd etishicha, ushbu jamiyat ixtiyorida katta yuk ortiladigan avtomashinalar mavjud emas.

Turkmanistondan nima olib kelinayotgani yoki olib ketilayotgani noma’lumligicha qolmoqda. Hatto turkamanistonlik bojxona organlarining Milliy xavfsizlik vazirligidagi kuratori va bojxona xodimlari ham bu borada ma’lumotga ega emas. O‘zbekistondan qaytishda furalarni Lebap va Ahal viloyatlari oralig‘ida xavfsizlik vazirligi zobitining topshirig‘i bo‘yicha Lebap yo‘l politsiyasi vakillari kuzatib qo‘ymoqda.

“Forob” punktida ishlovchi bojxona xodimlaridan birining aytishicha, MXV kuratoriga bojxonadan o‘tadigan har qanday mashina yukxonasini tekshirish vakolati berilgan. Ammo u ushbu to‘rtta yuk mashinasiga yaqinlashmagan, chegarachilar va bojxona xodimlariga ham tekshiruvlarni taqiqlagan. Kurator yo‘q vaqtida ushbu mashinalardan birida tekshiruv o‘tkazmoqchi bo‘lgan Gazachagdagi bojxonaning yangi xodimiga qattiq hayfsan berilgan va lavozimi pasaytirilgan.

“Xronika Turkmenistana” nashrining yozishicha, bojxona nazoratidan Dovletovaga tegishli yuklardan tashqari boshqa furalar ham tekshirilmasligi holatlari tez-tez kuzatiladi.

Toshhovuzda “Toshhovuz—Shovot” punktlari orqali Ahal va Balkanobod viloyatlari davlat raqamlariga ega avtomashinalar xorijning xususiy qurilish firmalariga tegishli Komatsu texnikalarini O‘zbekistonga olib o‘tmoqda.

Bundan tashqari, Turkmanistondan tanqisligiga qaramay sement va boshqa qurilish mollari ham olib chiqib ketilmoqda. Mamlakatda oziq-ovqat mahsulotlari, xususan, un, tuxum, tovuq go‘shti va yog‘ mahsulotlari ham taqchil bo‘lib qolgan.