Eron tashqi ishlar vazirligi Rossiya prezidenti Vladimir Putin hamda Turkiya davlat rahbari Rajab Toyyib Erdo‘g‘on o‘rtasida Suriyada qo‘shma patrul tadbirlari o‘tkazilishi haqidagi memorandum imzolanganini qo‘llab-quvvatladi, deb yozmoqda “RIA Novosti”.

“Eron Suriyaning hududiy yaxlitligi va milliy suvernitetini saqlab qolishi yo‘lida amalga oshirilgan hamda hududdagi vaziyatni o‘nglashga qaratilgan har qanday harakatni qo‘llab-quvvatlaydi”, — deya ta’kidlagan Eron tashqi ishlar vaziri Abbos Musaviy.

Avval Erdo‘g‘on Rossiya bilan qo‘shma patrul tadbirlari Turkiya chegarasidan Suriya ichkarisiga tomon 10 kilometr kenglikda amalga oshirilishini ma’lum qilgan.

Turkiya tashqi ishlar vaziri Mevlyut Chavusho‘g‘li patrul tadbirlari Suriya shimoli-sharqida kurdlar istiqomat qiladigan Qamishli viloyatini chetlab o‘tishini bildirgan.

Anqara 9-oktabrda Suriya shimoli-sharqida “Suriya demokratik kuchlari”, Kurdiston ishchi partiyasi kurd jangarilari hamda IShID terrorchilarini chegara hududidan quvib chiqarish va u yerda Turkiyadagi qochoqlar uchun “xavfsiz zona” tashkil qilish maqsadida “Tinchlik bulog‘i” harbiy operatsiyasini boshlagan.

17-oktabrda Turkiya va AQSh rasmiylari Anqarada Suriyadagi “Tinchlik bulog‘i” operatsiyasini kurdlar chegara hududidan chiqib ketishi uchun 120 soatga to‘xatishni kelishib olgandi. Kurdlarning hududni tark etishi bo‘yicha mas’uliyat Vashington zimmasiga yuklatilgan. Shuningdek, AQSh Turkiyaga nisbatan qo‘llanilgan sanksiyalarni ham bekor qilishga rozi bo‘lgandi.22-oktabr, seshanba kuni Rossiya prezidenti Vladimir Putin hamda Turkiya davlat rahbari Rajab Toyyib Erdo‘g‘on Sochida Suriyadagi vaziyatni muhokama qilgan va qochoqlar uchun “xavfsiz zona” tashkil qilishda qo‘shma patrul tadbirlarini amalga oshirish yuzasidan memorandum imzolagan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.