MDH Parlamentlararo assambleyasi (PA)ning bosh qarorgohi — Sankt-Peterburgdagi Tavrida saroyida MDH PAning Madaniyat, axborot, turizm va sport masalalari bo‘yicha Doimiy komissiyasi majlisi bo‘lib o‘tdi, deya xabar bermoqda MDH PA matbuot xizmati.
Tadbirda Ozarbayjon, Armaniston, Belarus, Qozog‘iston, Moldova, Rossiya, Tojikiston va O‘zbekiston parlamentlari vakillari ishtirok etgan. Majlis o‘z ishini tashkiliy masalani ko‘rishdan boshlagan.
Unda O‘zbekiston Oliy Majlisi Qonunchilik palatasining Budjet va iqtisodiy islohotlar masalalari bo‘yicha qo‘mitasi raisi Adham Shodmonov MDH PAning madaniyat, axborot, turizm va sport masalalari bo‘yicha Doimiy komissiyasi raisi etib saylangan.
Komissiya a’zolariga Shodmonovning nomzodini tanishtirarkan, MDH PA Kengashi kotibiyati rahbari — bosh kotibi Dmitriy Kobitskiy MDH PA ishiga O‘zbekiston delegatsiyasining faol qo‘shilganini olqishlagan.
“Yaqindagina, shu yili, O‘zbekiston MDH PA bo‘yicha Konvensiyaga qo‘shildi va bizning katta parlament oilamizning to‘laqonli a’zosiga aylandi. O‘zbekiston delegatsiyasi bizning umumiy ishimizga katta hissa qo‘shishiga ishonchim komil”, — dedi u.
Adham Shodmonov bildirilgan ishonch uchun hamkasblariga minnatdorlik bildirib, jumladan, shunday degan: “Sizlarni ishontirib aytamanki, umumiy faoliyatimiz uchun bor kuchimni safarbar etaman, bor bilim va tajribamni ishga solaman”.
Majlisdan, shuningdek, Ozarbayjon Milliy Majlisining mehnat va ijtimoiy siyosat masalalari bo‘yicha qo‘mitasi va madaniyat masalalari bo‘yicha qo‘mitasi a’zosi Elmira Oxundova MDH PAning madaniyat, axborot, turizm va sport masalalari bo‘yicha Doimiy komissiyasi raisi (Adham Shodmonov)ning o‘rinbosari etib yangi muddatga saylangan.
Izoh (0)