Turkiya “Xalq o‘z-o‘zini himoya qilish kuchlari” kurd guruhlarining o‘t ochmaslik rejimini buzganlikda aybladi. Bu haqda “Kommersant” xabar berdi.

“Oxirgi 36 soat ichida Kurdiston ishchi partiyasi va “Xalq o‘z-o‘zini himoya qilishi kuchlari” 14 marta otishmalar sodir etgan, bu kabi salbiy holatlarning 12 tasi Ras al-Aynda, bittasi Tell-Obod va yana bittasi Tell-Tamerda sodir bo‘lgan”, — deyiladi Turkiya milliy mudofaa vazirligi xabarida. Shuningdek, Turkiya hukumati AQShni ham kurdlarning ushbu harakatlari yuzasidan ogohlantirgan.

18-oktabr, juma kuni Turkiya prezidenti Rajab Toyyib Erdo‘g‘on AQSh vitse-prezidenti Mayk Pens bilan muzokaralardan keyin Suriya shimoli-sharqidagi “Tinchlik bulog‘i” operatsiyasini 120 soatga to‘xtatilganligini e’lon qilgandi. Anqara kurdlarning chegara hududidan uzoqlashishini va og‘ir artilleriya vositalarini topshirishini talab qilgan.