IIV jamoatchilik va OAV bilan aloqalar boshqarmasi tashabbusi bilan 17-oktabr, payshanba kuni Axborot va ommaviy kommunikatsiyalar agentligida matbuot anjumani o‘tkazildi.
Unda yaqin qarindoshlarning ishonchnomasiz mashina boshqarishi masalasiga ham to‘xtalib o‘tildi. Prezident qarorida 1-oktabrdan mumkin deyildi. Lekin hozircha qonunosti hujjatlariga o‘zgarish kiritilmadi, tartibi tasdiqlanmadi.
IIV YHXBB matbuot xizmati rahbari Akmal Yunusov bunga quyidagicha izoh bergan:
“Haqiqatdan hozirda qaror loyihalari tasdiqlanish arafasida. Shunga qaramasdan bugungi kunda ham fuqarolar sug‘urta polisida ism-familiyasi ko‘rsatilgan bo‘lsa yoki sug‘urta polisi umumiy bo‘lsa, yaqin qarindoshlarining mashinalarini ishonchnomasiz boshqarishi mumkin, bunga to‘sqinlik yo‘q”.
Huquqshunos va bloger Xushnudbek Xudoyberdiyevning qo‘shimcha qilishicha, agar sug‘urta polisi umumiy olingan bo‘lsa va unda familiyalar ko‘rsatilmagan bo‘lsa, unda yaqin qarindoshlikni isbotlash tartibi qanday bo‘ladi, degan savolga hali rasmiy hujjat qabul qilinmagani uchun aniq javob berilmagan.
Izoh (0)