Samarqanddagi bog‘cha faoliyati ommaviy zaharlanishdan so‘ng to‘xtatilganiga qaramay ishlashda davom etgani aniqlandi

Samarqanddagi bog‘cha faoliyati ommaviy zaharlanishdan so‘ng to‘xtatilganiga qaramay ishashda davom etgani yuzasidan Bosh prokuratura bayonot berdi.

Samarqand shahrining 80, 98 hamda 106-sonli maktabgacha ta’lim tashkilotlarida 11-oktabr kuni 12 nafar tarbiyalanuvchilari zaharlanganligi holati yuzasidan jinoyat ishi qo‘zg‘atilib, tergov harakatlari olib borilayotganligi hamda shu jarayonda viloyat DSENM tomonidan qayd etilgan MTT faoliyatlari vaqtincha to‘xtatilganligi haqida xabar berilgan.

14-oktabr kuni “Sevimli” telekanali orqali efirga uzatilgan ko‘rsatuvda yuqoridagi MTTlarning faoliyati vaqtincha to‘xtatilganligiga qaramasdan ishlayotganligi tanqid qilingan. Bu ma’lumotlar o‘rganilganda, haqiqatan ham ushbu MTTlar 12-oktabr kuni qisman bolalarni qabul qilib, faoliyat yuritgani aniqlangan.

Xususan, shahar DSENM tomonidan 98 va 106-sonli MTTlar faoliyatini vaqtincha to‘xtatish haqidagi qarorlari, kechikib MTT rahbarlariga taqdim qilinganligi sababli qisman faoliyat yuritgan.

Xabarda aytilishicha, yuqoridagilarga ko‘ra Samarqand shahar prokurori tomonidan viloyat DSENM bosh shifokori va viloyat maktabgacha ta’lim boshqarmasi boshlig‘i nomiga 2 ta taqdimnoma kiritildi.