Afrikadagi ko‘lda do‘stlari bilan cho‘milayotgan 12 yoshli bola timsohga yem bo‘ldi

Sharqiy Afrikadagi Viktoriya ko‘lida do‘stlari bilan cho‘milayotgan tanzaniyalik 12 yoshli bola timsohga yem bo‘ldi, deb yozmoqda The Citizen.

Ma’lum bo‘lishicha, Magesa Biseko 11-oktabr, juma kuni do‘stlari bilan cho‘milish uchun Viktoriya ko‘liga kelgan. Bolalar ko‘lga uloqtirilgan butilkani kim birinchi topib olishga bellashgan. Shu paytda suvdan timsoh chiqib bolani tutib olgan. Bolla hatto baqirishga ham ulgurmagan.

Do‘stiga nima bo‘lganini tushunmagan bolalar suvdan chiqib odamlarni yordamga chaqirgan, ammo kech bo‘lgan. Bisekoning jasadi qoldiqlari 13-oktabr kuni bolalar cho‘milgan joy yaqinidan topilgan.

Bolaning 16 yoshli do‘sti Kviteka Kadushining aytishicha, Biseko do‘stlari orasida eng yaxshi suzuvchi bo‘lgan. Ular tez-tez cho‘milishga borgan va o‘zaro bellashgan. O‘sha kuni ular 3 marta bellashgan va hammasida Biseko yutgan. To‘rtinchi marta bellashmoqchi bo‘lishganida timsoh hujum qilgan.

Kadushi boshqa hech qachon u ko‘lda cho‘milmasligini aytgan.