“Bobo aybdor!” - “Yo‘q, hokim aybdor!” Ijtimoiy tarmoqlar Mirishkor hokimi va makkajo‘xori “o‘g‘risi” haqida

Ijtimoiy tarmoqda hokim va makkajo‘xori o‘g‘risi voqeasi muhokama qilinmoqda.

Mirishkor tumani hokimi va makkajo‘xori o‘g‘risi voqeasi ijtimoiy tarmoqlarda asosiy mavzuga aylanib ulgurdi. Kimdir hokimni qoralasa, kimdir makkajo‘xori o‘g‘risini qoralaydi. Yana kimdir hokimning o‘g‘rini koyishini olqishlasa, boshqa birov hokimni 10 dona makkajo‘xori uchun past ketdi deydi.

“Daryo”ga o‘z fikr va mulohazalarini yuborgan Navoiy viloyatining Paxtachi tumanida yashovchi Sharofat Qalandarova ushbu voqea unga qattiq ta’sir qilganini yozib, Ravshan Komilovni makkajo‘xori uchun past ketishda aybladi.

— Hokim ham shunchalik past ketadimi? Yetti yo sakkiz dona makka uchun boboni nevara oldida yerparchin qilish mumkinmi?, – deb yozadi Sharofat Qalandarova. – Bag‘rikeng o‘zbegim shunchalik pastlab ketdimi? Hokim tayinlanganda uning madaniyati, ma’naviyati o‘rganilmaydimi? Nahotki inson qadri to‘rt dona makkadan ham xor bo‘lsa?

Mushtariy o‘z fikr-mulohazalarini bayon qilar ekan, Mirishkor tumani hokimi murojaat qildi.

Mirishkor tumani hokimi Ravshan Komilov!!! Odatda Siz tengilarga “o‘g‘lim” deb murojaat etardim. Sizni unday atagim kelmadi. Yaxshiyam Sizga ona emasman, ustoz ham. Lekin zamondoshman, vatandoshman, millatdoshman! Afsuski shu vajdan bo‘lib o‘tgan “makkajo‘xori voqeasi”ga loqayd qarab ketolmadim. Vijdonim chidamadi.

Ko‘rdim, xalqdan uzr so‘rabsiz. Nabiralari oldida bobolik maqomini yerparchin qilib, hatto o‘zini o‘ldirishini so‘ragan vatandoshingizdan uzr so‘radingizmi? Hayf o‘sha o‘z ahlini, millatdosh bolalari dilini vayron etib, to‘rtta makkani ularning qo‘lidan tortib olib chet elga eksport qiluvchi sizdek “vatanparvar hokim”ga!

Samarqandlik bloger G‘ayrat Yo‘ldosh esa Mirishkor tumani hokimining tanbehi o‘rinli ekanligini aytib, hokimni qopib gapirishda aybladi:

...avvalambor hokimning tanbehi o‘rinli, yosh avlodni o‘g‘irlikka o‘rgatguncha bolalarga birovni narsasini so‘ramasdan olish mumkin emasligini tushuntirish kerak. Ammo hokim tanbehni qo‘pol so‘zlar bilan so‘kinib berib noto‘g‘ri qilgan. Ayniqsa yosh bolalar oldida.

Xo‘sh, hokim nima qilishi kerak edi? Hokim so‘kinmasdan o‘sha odamga kelajakda bolalarga ham saboq bo‘ladigan qilib, xushmuomalalik bilan chiroyli tanbeh bersa ham bo‘lar edi. Ammo Mirishkor hokimining aqli shunga yetmabdi.

Rayhon Yusufova ismli Facebook foydalanuvchisi “hokim qilgan ishi uchun uzr so‘rabdi, lekin makkani olgan inson-chi? Nevaralariga o‘g‘irlikni o‘rgatgani uchun nevaralaridan uzr so‘ramaydimi? Yosh avlodga bunaqa tarbiya berish kerakmas-ku”, – deya izoh qoldirdi.

Aksariyat Facebook foydalanuvchilari biror-bir qilg‘ilikni qilib qo‘yib, kechirim so‘rash hokimlar odatiga aylanganini tanqid qildi. Hafiza Eshturdiyevna ismli ijtimoiy tarmoq foydalanuvchisi hokimning otasi tengi kishini sansirab gapirishini qoraladi:

...yoshgina odam ekan, otasi tengi odamni sensirab, nabiralarining oldida haqorat qilib, yer bilan bitta qilib bechora bobosini, endi kechiringmish...

“Daryo”ga o‘z fikr mulohazalarini yuborgan qashqadaryolik Nasiba Ibragimova esa bobo noto‘g‘ri qilmishi bilan nabiralariga tarbiya berayotganini qoralab, ertaga o‘sha nabiralar bobosidan o‘rnak olib o‘g‘irlik qilishdan tap tortmasligini yozdi.

Huquqshunos Xushnudbek Xudoyberdiyev o‘z fikr-mulohazalarini bildirar ekan, bugungi kunda hokimlarning ijobiy imijini tiklash qiyin masala ekanligini aytdi:

Aksariyat insonlar faqat hokimni aybdor sifatida ko‘rsatayotgani shaxsan meni hayron qoldirgani yo‘q. Chunki yurtimizda sodir bo‘lgan voqealar tendensiyasi hokimlar va hokimiyat vakillariga nisbatan juda katta negativni shakllantirib qo‘ydi. Bundan buyon hokimlarning ijobiy imijini tiklash oson ish emas, albatta. Shuning uchun ham xalq vakillari bahsli vaziyatlarning barchasida bor nafratini aynan hokimlarga to‘kib soladi, voqeaning boshqa ishtirokchilari unutiladi.

Alimoff Telegram-kanali bugungi kunda hokimlarga og‘zi qon bo‘riga qarayotgandek qarash shakllanganini tanqid qildi:

Agar o‘sha chol shu o‘g‘irlikni qilmaganida, o‘sha ish bo‘larmidi? Hokim kelib uni so‘karmidi? Net kaneshna. Olomonga ham hayronsan. Hokim bo‘lsa bo‘ldi, unga xuddiki yesa-yu yemasa og‘zi qon bo‘riday qarashga o‘rganib qoldik. 10 dona so‘ta bilan eksport kamayib qolarmidi deyishi mumkin qaysidir aqlli. Bunaqa vaziyatda o‘g‘ri bitta bu odam bo‘lmaydi, bu odam shunchaki qo‘lga tushgani xolos. Misol Anjan hokimiyam, Farg‘ona hokimiyam shu so‘kinib gapirgani uchun qo‘lga tushaverganidan ko‘zimizga baloday ko‘rinadi, mindey opqarasa farishta hokimlar ham bulardan beshbattar so‘kinishi mumkin, faqat ularni gapi chiqmaydi zapis bo‘lib. O‘g‘ri ham xuddi shunday. Shunchaki qo‘lga tushganini ko‘rdik.